«Ռիլզոմանիան չի նահանջում անգամ ողբերգական դեպքերում» Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Ապշելու է: Ես «Ֆեյսբուք»-ում ներկայացրել էի, թե ինչպես է Լոռու մարզպետը այցելում խեղդված երկու քույրերի որոնողական աշխատանքների վայր՝ միկրոֆոնը շապկին փակցրած, որ սոցցանցային տեսանյութ անի համապատասխան ձայնով: Ռիլզոմանիան փաստորեն չի նահանջում անգամ ողբերգական դեպքերում:

Հիմա էլ, ներքին գործերի նախարարությունը սոցցանցում տեղեկություններ ու լուսանկարներ է հրապարակում, թե ինչպես է նախարարը պարգեւատրում խեղդված երեխաների որոնողական աշխատանքին մասնակցած փրկարարներին: Ընդ որում, լուսանկարներում այնպիսի հանդիսավորություն է, կարծես խոսքը ուրախ առիթի մասին է: Այն դեպքում, երբ ողբերգությունն է առիթը:

Ծանր աշխատանք կատարող մեր փրկարարները իհարկե պետք է խրախուսվեն, պետք է լինեն ուշադրության կենտրոնում, բայց, երբ ողբերգությունն է առիթը՝ այդ ամենը պետք է անել չափազանց զուսպ եւ զգույշ անտուրաժով, որ ոչ մի կերպ չնկատվի դրա գերատեսչական PR էլեմենտը:

Իսկ այստեղ դա ակնառու է: Ընդ որում, խոսքը բոլորովին այդ տղաների PR-ի մասին չէ բնականաբար, այլ նրանց վերադասների՝ իբրեւ խրախուսում են, գնահատում են ծանր աշխատանքը, եւ այլն: Իրականում, տեսնում են դեպքի հանրային հնչեղությունը եւ ըստ այդմ՝ գործում քարոզչական հնարամտությամբ: Իսկ դա վանող է, մեղմ ասած, շատ մեղմ ասած»: