Երկուշաբթի, 23 փետրվարի, 2026 թ.
|
Ստեփանակերտում`   +4 °C

Մեծ Բրիտանիայի թագուհին, ԱՄՆ և ՌԴ նախագահները՝ Փարիզի Աստվածամոր տաճարի հրդեհի մասին

Մեծ Բրիտանիայի թագուհին, ԱՄՆ և ՌԴ նախագահները՝ Փարիզի Աստվածամոր տաճարի հրդեհի մասին
1827
Երեքշաբթի, 16 ապրիլի, 2019 թ., 15:55

Մեծ Բրիտանիայի թագուհին ցավակցական ուղերձ է հղել Ֆրանսիայի նախագահ Էմանուել Մակրոնին: Նա հայտարարել է, որ «խոր ցավ» է ապրել կատարվածից, և արտահայտել է իր «անկեղծ հիացմունքը» հրշեջների աշխատանքի նկատմամբ, փոխանցում է CNN-ը: «Արքայազն Ֆիլիպը և ես խորապես ցավում ենք, որ տեսնում ենք Փարիզի Աստվածամոր տաճարը հրդեհով ծածկված: Ես ընդգծում եմ իմ անկեղծ հիացմունքը արտակարգ իրավիճակների ծառայության աշխատակիցների նկատմամբ, ովքեր վտանգել են իրենց կյանքը՝ փորձելով փրկել այս կարևոր ազգային հուշարձանը: Իմ մտքերն ու աղոթքները նրանց հետ են, ովքեր այս դժվարին ժամանակներում տաճարի և ամբողջ Ֆրանսիայի կողքին են»:

ԱՄՆ նախագահ Դոնալդ Թրամփը Փարիզում տեղի ունեցածին արձագանքել է Twitter-ում կատարած գրառմամբ. «Աստված օրհի Ֆրանսիայի ժողովրդին»:

Կրեմլի պաշտոնական էջի հաղորդմամբ Վլադիմիր Պուտինը ևս ցավակցական հեռագիր է ուղղել նախագահ Էմանուել Մակրոնին. «Փարիզի Աստվածամոր տաճարը Ֆրանսիայի պատմական խորհրդանիշն է, եվրոպական և համաշխարհային մշակույթի անգնահատելի գանձը, քրիստոնեական ամենակարևոր սրբավայրերից մեկը: Փարիզում այս գիշեր տեղի ունեցած տագնապը ցավ պատճառեց նաև ռուսներին»:

Հիշեցնենք, որ ՀՀ վարչապետ Նիկոլ Փաշինյանը ևս արձագանքել էր Փարիզում տեղի ունեցածին։