«Աննա Դանիբեկյանը պարտավոր էր խափանման միջոցին անդրադառնալ մինչև գործի քննությունը». Հայկ Ալումյան

Սեպտեմբերի 12-ին Երևան քաղաքի դատարանի Շենգավիթի նստավայրում տեղի է ունենալու ՀՀ երկրորդ նախագահ Ռոբերտ Քոչարյանի և մյուսների գործով առաջին դատական նիստը: Այդ գործը մակագրվել է դատավոր Աննա Դանիբեկյանին:

Ռոբերտ Քոչարյանի պաշտպան Հայկ Ալումյանը, սեպտեմբերի 3-ին լրագրողների հետ ճեպազրույցում, հարցին, թե դատավորն այդ նիստում պետք է խափանման միջոցի հա՞րցը քննի, թե՞ գործը շարունակի այն տեղից, որտեղ հասել էր դատավոր Դավիթ Գրիգորյանը, ասել է. «Դատավոր Դավիթ Գրիգորյանը գործի քննություն չի էլ սկսել, նա կայացրել է գործը կասեցնելու որոշում: Հիմա Աննա Դանիբեկյանը պետք է գործի քննությունն սկսի զրոյից: Իսկ կանդրադառնա խափանման միջոցին, թե՞ ոչ, նա պարտավոր էր խափանման միջոցին անդրադառնալ անգամ մինչև գործի քննությունն սկսելը: Եվ երբ մենք ասում էինք, որ Աննա Դանիբեկյանը գործն սկսել է կոպիտ խախտումներով, առաջին հերթին հենց դա նկատի ունեինք»,- ասաց փաստաբանը: Նա նշեց, որ դատավորը խափանման միջոցի հարցը պետք է քններ գործը վարույթ ընդունելուց հետո 15-օրյա ժամկետում: Այդ ժամկետը լրանում է սեպտեմբերի 4-ին:

Հիշեցնենք, որ Աննա Դանիբեկյանը գործը վարույթ է ընդունել օգոստոսի 19-ին: Հ. Ալումյանը հայտնեց, որ դատական առաջին նիստում ինքը բարձրացնելու է խափանման միջոցի հարցը: Ավելին՝ նա անգամ չբացառեց, որ խափանման միջոցի հարցն օրենսդրության շրջանակում չքննելու հիմքով դատավորի ինքնաբացարկի միջնորդություն ներկայացնեն, մանավանդ որ՝ իրենց պնդմամբ՝ դատավորը մի քանի կոպիտ խախտում արդեն կատարել է: