«Ապոկալիպտիկ եզրակացություններ չպետք է անել». վարչապետ

684

Երկուշաբթի, 02 մարտի, 2020 թ., 12:50

«Հիվանդացության նոր դեպքեր չունենք, մի քանի կասկածելի դեպքեր ախտորոշվել են, պատասխանը բացասական է եղել: Եվս 9 թեստերի պատասխանների սպասում ենք, դրանք հայտնի լինելուն պես կտեղեկացնենք: Հույս ունենք, որ դրանք չեն հաստատվի, բայց եթե հաստատվեն, խուճապի առիթ չպետք է լինի: Սա հաղթահարելի հիվանդություն է: Ապոկալիպտիկ եզրակացություններ չպետք է անել: Ունենք հիվանդ, որ դե յուրե հիվանդ է, բայց դե ֆակտո այդքան էլ հիվանդ չէ». մարտի 2-ին կորոնավիրուսի տարածումը կանխարգելող աշխատանքները համակարգող հանձնաժողովի նիստի ամփոփմանն ասաց ՀՀ վարչապետ Նիկոլ Փաշինյանը:

Նա նշեց, որ ինքնազգացողության խնդիրներ չունի նաև հյուրանոցի անձնակազմը: Ըստ նրա՝ վերջին օրերին ահազանգերի թիվը շատացել է, սակայն ոչ մեկը չի հաստատվել:

Վարչապետը տեղեկացրեց, որ որոշվել է խստացնել սահմանափակումները հայ-իրանական սահմանով, իսկ հնգօրյա ժամկետում կվերականգնվի Իրանի հետ վիզային ռեժիմի գործընթացը:

Աշխատանքային խումբը խորհուրդ է տալիս ՀՀ քաղաքացիներին՝ հնարավորինս սահմանափակել ուղևորությունները դեպի Իտալիա և Թուրքիա: Թե ինչու այլ ուղղություններով հաղորդակցությունը չի փակվում, Ն. Փաշինյանը նշեց, որ տվյալ պահին գնահատել են ամենառիսկային ուղղությունները: