«Եթե չխանգարեին, ինչքան բան կարող էինք անել». Հայկ Մարության

«Ազգային առաջընթաց» կուսակցության քաղաքապետի թեկնածու, Երևանի նախկին քաղաքապետ Հայկ Մարությանը հույս ունի ընտրություններին հավաքել այնքան ձայն, որ հնարավոր լինի կազմել քաղաքային իշխանություն։ «Ազատության» «Ֆեյսբուքյան ասուլիսի» ժամանակ նա ապատեղեկատվություն որակեց «ռուսական պրոյեկտ» լինելու, «Ապրելու երկրին» սատարելու և նմանատիպ այլ լուրերը։

Մարությանը նաև պնդեց՝ իրեն փորձել են խանգարել. «Այդ երեք տարվա աշխատանքը բավականին պրուդոկտիվ է անցել, թեև իշխանությունները խանգարում էին ինձ, քաղաքապետարանին տարբեր ծրագրեր իրականացնել։

Եթե չխանգարեին, ինչքան բան կարող էինք անել, մենք բազմաթիվ հարցերով դիմում էինք կառավարություն, ու կառավարությունը մեզ մերժում էր տալիս տարբեր պատճառաբանություններով: Հիմա՝ հենց ընտրություններից առաջ, տասը միլիարդ դրամի չափով կառավարությունը օգնություն է ցուցաբերում Երևանի քաղաքապետարանին։ Շատ մոնիթորինգային ընկերություններ ասում են, որ սա կարելի է ընտրակաշառք դիտել, բայց ցավում եմ, որ այս տասը միլիարդն այս պահին քաղաքապետարանը շատ հապճեպ փորձում է իրագործել: Այդ գումարով կատարվող աշխատանքներն անորակ են, մսխվում են և այն աշխատանքները, որ դրանով հապճեպ արվում են, հետագայում պետք է կրկին անենք»։