«Մեզ համար անընդունելի է ՀՀ ինքնիշխանությունը կամ իրավազորությունը կասկածի տակ դնող որևէ հայտարարություն». Փաշինյան

«Արդյոք մենք դեմ ենք Հորադիզ-Մեղրի-Օրդուբադ-Երասխ երկաթուղու վերաբացմանը, ո՛չ. արդյոք դեմ ենք տարածաշրջանի տրանսպորտային երթուղիների բացմանը, ո՛չ. արդյոք դեմ ենք, որ ՀՀ տարածքով անցնեն տարածաշրջանային գազամուղեր, նավթամուղեր, էլեկտրական հաղորդման գծեր, ո՛չ: Այդ ամենը պետք է տեղի ունեն ՀՀ ինքնիշխանության և իրավազորության սահմաններում, ինչպես նաև մյուս երկրների ինքնիշխանության և իրավազորության սահմաններում»,- ԱԺ-Կառավարություն հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը: Նրա խոսքով՝ վերոնշյալ նախագծերին ՀՀ-ն ոչ միայն կողմ է, այլև շահագրգռված. «Մեզ համար անընդունելի է, կարմիր գիծ է ՀՀ ինքնիշխանությունը կամ իրավազորությունը որևէ կերպ կասկածի տակ դնող որևէ հայտարարություն»,- շարունակեց նա: