«Արցախի հանձնումը սկսվել է, երբ Նիկոլն ասել է՝ ինչ պետք է, այն էլ բանակցում եմ». Շարմազանով

Հայաստանի Հանրապետական կուսակցության գործադիր մարմնի անդամ Էդուարդ Շարմազանովը «Ալիք մեդիայի» եթերում պատասխանելով հարցին՝ ո՞վ զգետնեց Արցախի պետականությունը, ասել է. «Պարզ չէ՞, որ Նիկոլ Փաշինյանը և բոլոր նրանք, ովքեր սատարում են նրան: Արցախի հանձնումն այսօր չի սկսվել, այլ՝ երբ Նիկոլը հրահրեց պատերազմ՝ ասելով Արցախը Հայաստան է ու վերջ: Արցախի հանձնումը սկսվել է, երբ Նիկոլը ձերբակալել ու կալանավորել է Արցախի հերոսներին: Արցախի հանձնումը սկսվել է, երբ Նիկոլը Դուշանբեում սկսեց տետատետ հարաբերվել Ալիևի հետ: Արցախի հանձնումը սկսվել է, երբ Նիկոլը մերժեց ԵԱՀԿ ՄԽ համանախագահների ժառանգությունը: Արցախի հանձնումը սկսվել է, երբ Նիկոլն ասաց՝ ինչ պետք է, այն էլ բանակցում եմ...»: Հարցին՝ ինչո՞ւ էր ՀՀԿ-ն ուրախ Արայիկ Հարությունյանի հրաժարականով ու Սամվել Շահրամանյանի նախագահ դառնալով, Շարմազանովն ասել է. «Ուրախ, ոչ ուրախի խնդիր չկա: ՀՀԿ-ն մշտապես դեմ է եղել Արայիկ Հարությունյանի քաղաքական գործունեությանը, բայց եթե նա ընտրվել է նախագահ, իրավունք չունենք անել ամեն ինչ, որ հրաժարական տա, որովհետև եթե հրաժարական տվեց, ընտրություններով նախագահ ընտրվելու ինստիտուտը վտանգի տակ է. Ադրբեջանը կարող էր սա օգտագործել: Խոսել այն մասին, որ ՀՀԿ-ն դրդել է, որ Հարությունյանը հրաժարական տա, աբսուրդ է: Նա ի՛նքն է հրաժարական տվել»: