Իսրայելն սպառնացել է հարվածել Իրանին

Իսրայելի էկոնոմիկայի և արդյունաբերության նախարար Նիր Բարքաթը Daily Mail-ին տված հարցազրույցում ասել է, որ եթե Հեզբոլլահը փորձի երկրորդ ճակատ բացել հյուսիսում, Իսրայելն ստիպված կլինի հարձակվել Իրանի վրա։

Բարքաթն ընդգծել է, որ Իսրայելը պատրաստ է ոչ միայն դիմակայել Հեզբոլլահին, այլև թիրախավորել Իրանին։ Նա նշել է, որ Իրանի ծրագիրն է՝ բոլոր հնարավոր ճակատներից հարձակվել Իսրայելի վրա։

«Եթե տեսնենք, որ նրանք մտադիր են հարձակվել Իսրայելի վրա, մենք ոչ միայն պատասխան հարված կհասցնենք այս ճակատներին, այլև կհասնենք օձի գլխին, որը Իրանն է»,- ասել է նախարարը։

Ավելի վաղ Իսպանիայում Իրանի դեսպան Ռեզա Զաբիբը հայտարարել էր, որ Իսրայելի ցանկացած ագրեսիվ գործողություն Իրանի դեմ հզոր պատասխան կառաջացնի, Թեհրանը կստիպի Իսրայելին «զղջալ դրա համար»։