«Հայաստանը որևէ ներգրավվածություն չպետք է ունենա կոնֆլիկտում»․ Հակոբ Բադալյան

Քաղաքական մեկնաբան Հակոբ Բադալյանի գրառումը․ «Հնդկաստանի ու Պակիստանի միջև կոնֆլիկտը սրվում է: Իսլամաբադը հայտարարել է Հնդկաստանի դեմ ռազմական գործողություն սկսելու մասին, հարվածներ հասցնելով Քաշմիրի և Փենջաբի տարածքներում գտնվող հնդկական ռազմաբազաներին, հրթիռային պահեստներին:

Ի պատասխան, Պակիստանի երեք ռազմակայանի հարվածներ է հասցրել Հնդկաստանը:

Թեև անցնող տասնամյակներին երկու երկրների միջև մինչ այդ էլ ըստ էության եղել է մի քանի խոշոր ռազմական բախում, այդուհանդերձ տեղի ունեցողը ըստ էության ամենաուժգին լարվածությունն է նրանց միջև:

Ի դեպ, Հնդկաստանի տուրօպերատորները դադարեցրել են փաթեթների վաճառքը Ադրբեջան ու Թուրքիան, քանի որ Բաքուն ու Անկարան աջակցություն են հայտնում Պակիստանին:

Հիշեցնեմ նաև, որ Հայաստանից օրերս արձագանքել էր Հայաստանի արտգործնախարարը, որը խորհրդարանում ի պատասխան պատգամավորների հարցի ասել էր, որ Երևանը դատապարտել է ապրիլի 22-ին Քաշիմիրում տեղի ունեցած ահաբեկությունը, ինչպես նաև համարում է, որ ցանկացած երկիր ունի ահաբեկությունից պաշտպանվելու իրավունք: Ըստ էության, դա բավականին «կանոնիկ», բայց թափանցիկ աջակցություն է Հնդկաստանին:

Նաև հիշեցնեմ, որ օրերս տեղեկություն եղավ մայիսի 12-ին Հայաստանի ԱԽ քարտուղարի՝ Հնդկաստան այցի մասին: Խոշոր հաշվով, դա ևս իր մեջ պարունակում է որոշակի դիրքորոշում:

Անշուշտ, այդ ամենը միանգամայն հասկանալի է, նկատի ունենալով այն կապերը, որ հատկապես ռազմա-տեխնիկական ոլորտում հաստատել են Հնդկաստանն ու Հայաստանը:

Հայաստանը բնականաբար որևէ ուղիղ ներգրավվածություն չունի և չպետք է ունենա կոնֆլիկտում, բայց նաև պետք է շարունակի աշխատանքը այն ուղղությամբ, որում ունի շահեր»։