Սամվել Կարապետյանը «տոկի տվեց» Նիկոլ Փաշինյանին. «Հրապարակ»

«Հրապարակ»-ը գրում է. «Մինչ Հայաստանն աղետից հինգ պակաս վիճակ է՝ Իրանում ստեղծված իրավիճակով պայմանավորված, իշխանական խմբակը շարունակում է արշավը Եկեղեցու դեմ։ Քառօրյա դադարից հետո Նիկոլ Փաշինյանը երեկ վերսկսեց Եկեղեցու դեմ արշավը և օրվա երկրորդ կեսից սկսած՝ իրար հաջորդող գրառումներ արեց, մեկը մյուսից խայտառակ՝ նախկին գրառումներից առավել անվայելուչ ու անթույլատրելի բառապաշարով։
Սկզբում մոսկվաբնակ գործարար Սամվել Կարապետյանին, որը հայտարարությամբ իր զորակցությունն էր հայտնել Եկեղեցուն։ «Մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա։ Ես միշտ եղել եմ հայոց եկեղեցու կողքին ու հայ ժողովրդի կողքին։ Եթե քաղաքական գործիչներին չհաջողվի, ապա մենք մեր ձեւով ենք միջամտելու եկեղեցու դեմ արշավին»,- ասել էր «Տաշիր գրուպ» ընկերության սեփականատեր Սամվել Կարապետյանը, որը, ի դեպ, այս բոլոր տարիներին ամեն հարցով աջակցել է Փաշինյանին։ Այս հայտարարությունը Փաշինյանն այնքան ծանր տարավ, որ ուղղակի ցնցումների մեջ ընկավ։ «Պոռնկաբարո «հոգևորականներն» ու նրանց պոռնկաբարո «բարեգործներն» ինչո՞ւ են ակտիվացել»,- գրեց նա՝ հենց Ազգային ժողովից, ուր գնացել էր հարցուպատասխանին մասնակցելու։ Ապա սպառնաց․ «Ոչինչ՝ նորից կպասիվացնենք։ Ընդ որում՝ ընդմիշտ»։ Մի քանի րոպե հետո էլ անդրադարձավ Արշակ արքեպիսկոպոսին, որը նախօրեին հրավիրված կլոր սեղան-քննարկման ժամանակ կոշտ քննադատել էր Նիկոլ Փաշինյանին: «Կտրիճ Ներսիսյան, էն պոռնկաբարո Արշակ «սրբազանիդ» ասա՝ վեր ընկնի տեղը։ Բառիս բուն իմաստով՝ վեր ընկնի տեղը, և բառիս բուն իմաստով՝ պոռնկաբարո»,- իր փայլուն բառապաշարը ցուցադրեց պետության ղեկավարը: Իսկ ավելի ուշ արդարացավ, թե սույն բառաֆոնդը գործածելիս հղում է արել «Կանոնագիրք Հայոց»-ին։

Ակնհայտ է, որ Փաշինյանը չի մարսել հոգևորականների վերջին օրերի պահվածքը և Եկեղեցու կողքին հայության համախմբումը: Հայաստանյայց առաքելական եկեղեցուն ոչ միայն մեծ թվով անհատ գործիչներ իրենց զորակցությունը հայտնեցին, այլ նաև՝ Մեծի Տանն Կիլիկիո Արամ Ա կաթողիկոսը, սփյուռքյան շատ գործիչներ, անգամ իր իսկ ձևավորած Հանրային խորհրդի անդամները դատապարտեցին այդ արշավը: Բայց Փաշինյանի հոգեկան աշխարհն ուղղակի քարուքանդ եղավ Սամվել Կարապետյանի հայտարարությունից, դրանում, հավանաբար, տեսնելով նաև Ռուսաստանից հնչած նախազգուշացում։ Գաղտնիք չէ, որ Սամվել Կարապետյանը Կրեմլի հետ ուղղակի շփումներ ունի:
Քաղաքական կուլիսներում խոսվում էր, որ Իրանում ստեղծված իրավիճակը կարող է հայկական և ադրբեջանական կողմերի համար առիթ դառնալ՝ իրագործելու Սյունիքի հետ կապված ծրագիրը, հենց այդ պատճառով էլ Ռուսաստանը խաղի մեջ է մտնում՝ ի դեմս Կարապետյանի։ Եվ փակուղում հայտնված Փաշինյանի նյարդերը տեղի տվեցին, նա հենց ԱԺ նիստերի դահլիճում նստած, երբ քննարկվում էր նախորդ տարվա բյուջեի կատարողականը, ստատուսներ էր գրում։ Ավելին, մեզ ասացին, որ նույն պահին հանձնարարել է նաև ՔՊ խմբակցության ղեկավարին, որ ԱԺ հայտարարությունների ժամը «նվիրեն» Եկեղեցուն և նրա «պոռնկաբարո» բարեգործներին։ Ով չալարեց՝ հակաեկեղեցական ելույթ ունեցավ, մանավանդ՝ այնպիսիք, որոնց ծպտունը գրեթե չի լսվել։ Ասենք, Տիգրան Պարսիլյանն ամբիոնին մոտեցավ և հեքիաթի ժանրում ելույթ ունեցավ, թե մենք բարձրաձայնում, պայքարում ենք հոգեւորականների խայտառակ կենսակերպի մասին, ոչ թե խայտառակում ենք եկեղեցին։ «Աջապահյան կոչվող սրբազան կա, հիշում եք, չէ՞, իրեն, երբ պատերազմի ժամանակ ուզում էր զինված հեղաշրջում աներ․․․»,- ասաց նա՝ չմանրամասնելով, թե ինչ նկատի ունի։ Նկատեցինք, որ Պարսիլյանը հուզված ընթերցում էր իր առջև դրված տեքստը:

Մեկ այլ ՔՊ-ական՝ Արմենուհի Ղազարյանը, աչքը չէր կտրում իր առջև դրված թղթից, ինչը մատնում էր, որ ուսապարկերին նախապես գրված տեքստեր էին ուղարկել, և ոմանք, գուցե համաձայն չլինելով, ստիպված էին դրանք բարձրաձայնել՝ կատարելով Փաշինյանի կամքը: Խոսեցին նաև կարկառուն ՔՊ-ականները, որոնք քննադատեցին ոչ թե հոգևորականներին, այլ՝ Սամվել Կարապետյանին: Օրինակ, Վահագն Ալեքսանյանը հիշեց, որ Հայաստանում հաճախակի են հոսանքի անջատումներ լինում, և Սամվել Կարապետյանը, որը ՀԷՑ-ի սեփականատերն է, «լավ կանի՝ դրանով զբաղվի, ոչ թե Եկեղեցու հարցերով»։ Եվ ասաց, որ Սամվել Կարապետյանն ակտիվացել է, քանի որ կառավարությունը վերջին շրջանում ՀԷՑ-ի հետ կապված կոշտ հանձնարարականներ է տվել։ Այնուհետև իշխանական լրատվամիջոցները տարածեցին, թե Փաշինյանն իբր մայիսի 21-ին հանձնարարել է պատժամիջոցներ կիրառել այդ ընկերության նկատմամբ, քանի որ երբ ինքն այցելել է թանգարան, այդ պահին հոսանքազրկվել է տարածքը։
Խմբակցության ղեկավար Հայկ Կոնջորյանն էլ Սամվել Կարապետյանից պարզաբանում էր պահանջում, թե էդ ինչ ձևերով եք հարցերը լուծելու: Հենց նույն ժամին որեւէ արգելք ու կարմիր գիծ չունեցող իշխանությունը օպերխումբ ուղարկեց Սամվել Կարապետյանի տուն՝ մեքենան առգրավեցին, հյուրերից մի քանիսին բերման ենթարկեցին, տանը խուզարկություն սկսեցին: Հարազատներն ու մտերիմները սկսեցին հավաքվել Ուլնեցու փողոցում: Թե ինչով կավարտվի այս պետական խուլիգանությունը, կերևա վաղը»:

Մանրամասները՝ թերթի համարում: