«Պետական աջակցությամբ առանձնատուն կառուցելու ծրագրից օգտվել են սահմանագոտու հետ կապ չունեցողներ»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը․ «Կողբում 277 տուն է կառուցվում, Մովսեսում՝ 1
Տավուշի մարզպետ Հայկ Ղալումյանին տեղեկատվական հարցում եմ արել․ «Տավուշի մարզի սահմանամերձ բնակավայրերում, պետական աջակցությամբ վարկային 17 կամ 21 միլիոն դրամ ֆինանսավորմամբ քանի՞ առանձնատուն է կառուցվել, ո՞ր բնակավայրերում՝ որքա՞ն, քանի՞ առանձնատան կառուցումն ընթացքի մեջ է։ Հայտնի՞ է ձեզ, որ այդ ծրագրով շատ առանձնատներ կառուցվել են ոչ սահմանամերձ գյուղերի բնակիչների կողմից»։ Մարզպետի աշխատակազմից ուղարկել են աղյուսակ՝ տվյալներով, թե Տավուշի սահմանամերձ որ գյուղում վերոհիշյալ ծրագրով քանի առանձնատան շինարարություն է հաստատվել, դրանցից քանիսի կառուցումն է ավարտված, քանիսն է բնակելի, բնակվող։ Մարզպետի աշխատակազմից նաև հայտնել են․ «Ծրագրի շահառուների վերաբերյալ մարզպետի աշխատակազմը հաշվառում չի իրականացնում»:
Ըստ մարզպետի աշխատակազմի՝ այդ ծրագրով Տավուշի մարզի սահմանամերձ 24 գյուղերում հաստատվել է 1501 տան կառուցում, որից ավարտված է 138-ի շինարարությունը, դրանցից բնակելի վիճակում են 108-ը, դրանից 18-ում են այժմ բնակվում։ Աչք է զարնում տարբեր գյուղերում այդ ծրագրից օգտվողների թվերի շատ մեծ տարբերությունը։ Տավուշի մարզի ամենամեծ բնակչություն ունեցող Կողբ գյուղում այդ ծրագրով հաստատված է 277 առանձնատան կառուցում, որից 6-ի շինարարությունն ավարտված է։ Բերդավան գյուղում հաստատված է 181, Այգեհովտում 179, Սարիգյուղում 118․ Բերքաբերում 101 տան շինարարություն։ Նոյեմբերյան համայնքի Բարեկամավան գյուղում ծրագրով հաստատվել է 1 տան կառուցում։ Բարեկամավանը փոքր գյուղ է, սակայն Բերդ համայնքի Մովսես, Իջևան համայնքի Ազատամուտ գյուղերը բնակչությամբ մեծ գյուղեր են, Մովսեսում հաստատված է 1, Ազատամուտում՝ 4 տների կառուցում։ Բերդ համայնքի Չինարի գյուղում հաստատված է 6, Իջևան համայնքի Վազաշեն գյուղում՝ 8 , Չորաթանում՝12, Ոսկեվանում՝ 14․ Դովեղում՝ 15․ Վերին Կարմիրաղբյուրում՝ 15 առանձնատան կառուցում։ Սահմանամերձ գյուղերի բնակիչները հայտնում են, որ սահմանագոտում տնազուրկ շատ ընտանիքներ չեն կարողացել օգտվել ծրագրից, քանի որ այդ ընտանիքների մի մասը սոցիալապես անապահով է, վարկային վատ պատմություններ ունի, իրենց վերաբեյալ դատական ակտերի հարկադիր կատարման ծառայությունում վարույթներ կան, ծրագրում ընդգրկված բանկերը չեն հաստատում այդ ընտանիքներին տներ կառուցելու նպատակով վարկերի տրամադրումը։ Սահմանագոտում պետական աջակցությամբ տներ կաոռւցելու ծրագրին մասնակցելու համար անհրաժեշտ փաստաթղթերը պատրաստելու համար հարկավոր է 700-800 հազար դրամ, որը տնազուկ շատ ընտանիքներ չունեն և չեն օգտվել ծրագրից։ Սակայն ծրագրից օգտվել են սահմանագոտու հետ կապ չունեցող, բանկային ոլորտի պաշտոնյաներ, Երևանի, Հայաստանի այլ բնակավայրերի բնակիչներ, սահմանագոտուում ծնված, սակայն վաղուց այլ տեղերում ապրողներ»։