«Մեզ գիտակցաբար տանում են էներգետիկ կախվածության». Բենիամին Մաթևոսյան

Քաղաքագետ Բենիամին Մաթևոսյանի ֆեյսբուքյան գրառումը՝ կից տեսանյութով. «Ադրբեջանական էներգակիրներին Հայաստանը այլընտրանք չպետք է ունենա։ Մենք ձեզ հետ արդեն հասցրել ենք խոսել այն մասին, որ բավականին ակտիվ մեր եվրոպացի հարգարժան գործընկերները խառնվում են Հայաստանի ներքին գործերին, բայց այսօր մենք այս հարցի պատասխանը ստացանք, թե ինչու է դա տեղի ունենում: Ըստ Եվրոպական դիվանագիտության ղեկավար Կայա Կալլասի, պաշտոնական Երևանը ինքն է խնդրել, որ Բրյուսելը աջակցի Երևանին, սպասվելիք խորհրդարանական ընտրությունների ժամանակ պայքարել արտաքին ազդեցության դեմ:
Աշխարհաքաղաքականության մեջ, իրականում, ամեն ինչ իր գինն ունի: Ու եթե պաշտոնական Երևանը այդպիսի բան է խնդրում, Բրյուսելն էլ ինքը իր, այսպես ասած, խնդրանքների ցուցակ պետք է ներկայացնի, պահանջների ցուցակ ներկայացնի: Պահանջներից մեկը վերաբերում է նրան, որ ռուսական էժան, որակյալ, և մատակարարման հետ կապված երբեք խնդիրներ չառաջացնող էներգակիրներից հրաժարվելն է: Այս մասին խոսել է ԵՄ ընդլայնման հարցերով հանձնակատար Մարթա Կոսը:
Այս լուրը համակցեք մեկ այլ լուրի հետ, որ առաջին անգամ պատմության մեջ Ադրբեջանից Հայաստան վառելիք է գալիս: Հասկանո՞ւմ եք՝ ինչ է տեղի ունենում։
Մենք խնդրում ենք Բրյուսելին աջակցություն՝ ընտրությունների ժամանակ վերընտրվելու համար, Բրյուսելը ասում է «ուրեմն այդ դեպքում գնացեք տնտեսական ինքնասպանության, Ռուսաստանի հետ տնտեսական կոոպերացիայից հրաժարվեք, ռուսական էներգակիրներից հրաժարվեք, փոխարենը գնեք ադրբեջանականը»:
Այսինքն ստացվում է, որ մեզ գիտակցաբար տանում են էներգետիկ կախվածության: Ադրբեջանական էներգակիրներին Հայաստանը այլընտրանք չպետք է ունենա»: