««Թրամփի ճանապարհի» բացման վերաբերյալ այլևս կասկած չկա». Ալիև

Այլևս կասկած չկա, որ այսպես կոչված «Զանգեզուրի միջանցքը» (Թրամփի ճանապարհ) կբացվի, տեղական լրատվամիջոցներին տված հարցազրույցում ասել է Ադրբեջանի նախագահ Իլհամ Ալիևը։
«Եվ ես վստահ եմ, որ Ադրբեջանի քաղաքացիները կասկած չունեն, որ Զանգեզուրի միջանցքը կբացվի։ Դրա անվանումը կարող է փոխվել, բայց էությունը մնում է նույնը։ Այսպիսով, բոլոր հարցերը, որոնք մենք պետք է լուծեինք Հայաստանի հետ հարաբերությունների կարգավորման գործընթացում, լուծվել են, ինչպես մենք ցանկանում էինք։ Իհարկե, Հայաստանի և Ադրբեջանի միջև նախաստորագրված խաղաղության համաձայնագրի և մեր կողմից ստորագրված համատեղ հռչակագրի կարևորությունը, անշուշտ, պարզ է։ Նախագահ Թրամփն այս հռչակագիրն ստորագրել է՝ որպես վկա»,- ասել է Ալիևը։ Նրա խոսքով՝ Ադրբեջանի և Ամերիկայի միջև հարաբերությունները զարգանում են շատ գործնական և արդյունքների վրա կենտրոնացած ուղղությամբ։