«Մոռացել են սեփական բարեվարքության կանոնները և իշխանիկի ձեռքին գործիք են դարձել»․ Րաֆֆի Հովհաննիսյան

«Ես անձամբ և, կարծում եմ, մեր ժողովրդի մեծամասնությունն այլևս չի ճանաչում պարոն Նիկոլին՝ որպես վարչապետ»,- այսօր Մայր Աթոռի բակում լրագրողների հետ զրույցում ասաց «Ժառանգության» առաջնորդ Րաֆֆի Հովհաննիսյանը՝ խոսելով վարչապետի և 10 եպիսկոպոսների կողմից ստորագրված հայտարարության մասին։ «Ինքը, որպես վարչապետ, առ ոչինչ է, անվավեր է, իսկ սրբազանները, կարծելով, որ ինչ որ սրբազան առաքելության մեջ են՝ մոռացել են սեփական բարեվարքության կանոնները և ուղղակի իշխանիկի ձեռքի գործիք են դարձել»,- շարունակեց նա։ Լրագրողի հարցին՝ չի՞ բացառում արդյոք, որ այդ հոգևորականների նկատմամբ կոմպրոմատներ կան, կամ ստիպում են, Րաֆֆի Հովհաննիսյանը պատասխանեց․ «Իրենց անձնական կյանքը ես չգիտեմ՝ մեկը կնոջ հետ է, մեկը տղայի հետ, մեկը ծառայության ընթացքում անձնական խնդիրներ են ունեցել Կաթողիկոսի հետ, բայց դա որևէ մեկին իրավունք չի տալիս փորձել մտնել ներքին կյանք և դրսից պահանջել սա կամ սա, կամ թող մնան եկեղեցու մեջ և փորձեն բարեփոխել ներսից, կամ թող բոլորը կարգալույծ լինեն և որպես քաղաքացիներ իրենց պայքարը տանեն»։