«Արթիկ» ՔԿՀ պետի տեղակալն ազատվել է պաշտոնից

«Արթիկ» քրեակատարողական հիմնարկի պետի տեղակալ Ռուբեն Գասպարյանն ազատվել է պաշտոնից․ այս մասին «Արմլուր»-ին հայտնել են ՀՀ արդարադատության նախարարությունից։ Վերջինիս ազատումը պայմանավորված է 2025 թվականի նոյեմբերի 28-ին Տավուշի Զորական գյուղի մի խումբ բարձր դասարանի աշակերտների կողմից քոլեջում սովորող տղային ծեծելու և նվաստացնելու դեպքի հետ, որի մասնակիցներից մեկը, ըստ տարածված տեղեկությունների, ՔԿՀ պետի տեղակալ Ռուբեն Գասպարյանի որդին է։

Հիշեցնենք, որ վերոնշյալ դեպքի տեսանյութը, որը նկարահանվել է ծեծկռտուքի մասնակից անչափահասների կողմից, տարածվել է սոցցանցերում։ Տեսանյութում երևում է, թե ինչպես են մի խումբ անչափահասներ ծեծում և նվաստացնում իրենց հասակակցին՝ ամբողջ ընթացքը տեսանկարահանելով։ Դեպքի մասով Քննչական կոմիտեն 5 անձի կալանավորելու միջնորդություն է ներկայացրել դատարան։ Դատարանը նրանցից մեկին 1 ամսով, երեքին՝ 20 օրով կալանավորելու որոշում է կայացրել, իսկ անչափահասներից մեկի նկատմամբ սահմանվել է տնային կալանք։