«Լավ է՝ չեք պարտադրում, որ ազգովի շնորհակալություն հայտնենք»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Պարտությունից և խաղաղության պարտադրումից հետո, բնական է, որ հայ-ադրբեջանական տնտեսական շփումներ պետք է լինեն: Համաձայն եմ և այդ մասին գրել եմ բազմիցս, որ երկու երկրների միջև տնտեսական գործակցությունը նաև լուրջ անվտանգային բաղադրիչ ունի: Բազմիցս եմ նաև գրել, որ, այո, Երևան-Բաքու տանելի հարաբերությունների դեպքում միայն կարող ենք հույս ունենալ, որ գերիները կամ նրանցից մի քանիսն ավելի շուտ տուն կվերադառնան: Այդ հարցով ավելի լավ է խոսել ուղիղ Ադրբեջանի հետ, քան գնալ և տարբեր խորհրդարաններում լոբբինգ անել: Լոբբինգը հաճախ աշխատում է դիվանագիտության դեմ, հատկապես երբ այն հրապարակային է արվում:
Բայց, պետք է կրկնեմ, որ նաև չպետք է մեր պարզ մարդկային ինքնասիրությունը և ազգային արժանապատվությունը ամեն օր գետնով տրվի:
Պաշտոնական քարոզչությունը հիմա էլ սկսել է ավետել ադրբեջանական վառելիքի նոր խմբաքանակի տեղ հասնելու մասին: Մեր համապատասխան նախարարը, որ օրումեջ այդ թեմայի մեջ է, պետք է ավելի նրբանկատ լինի: Եթե խոսքը լիներ Հայաստանից Ադրբեջան, ասենք, տասը շիշ կոնյակ կամ գինի արտահանելու մասին, ապա դա ընկալելի կլիներ: Ադրբեջանական արտադրանքի լոբբինգը պետք է անի Բաքուն և ոչ մեր կառավարությունը կամ անհատ նախարար:
Նաև մի բան եմ նկատել: Մեր իշխանություններն ու նրանց խոսնակները նեղվում են, որ ֆեյսբուքում քննադատում ենք Ադրբեջանին:
Սա դեռ ոչինչ: Ասում են՝ խաղաղություն չէիք ուզո՞ւմ, էնա վարչապետ Նիկոլ Փաշինյանը բերել է այդ խաղաղությունը:
Լավ է՝ չեք պարտադրում, որ ազգովի շնորհակալություն հայտնենք:
Վախենամ այդ օրն էլ կարող է գալ»: