«Վստահ եմ՝ լկտի ռեժիմը, տեղեկանալով հացադուլի մասին, ոչ թե կմտահոգվի, այլ կուրախանա»․ Արթուր Սուքոյան

Պատգամավոր Լևոն Քոչարյանի օգնական Արթուր Սուքոյանը ֆեյսբուքյան էջում գրում է. «Ապօրինի կալանավորված Նարեկ Սամսոնյանը, դատարանի հերթական՝ որևէ իրավական հիմնավորում չունեցող որոշումից հետո, հայտարարել է հացադուլ։
Այս քայլը չի կարող ընկալվել որպես հուզական պահի արձագանք։ Այն քաղաքական և բարոյական ակտ է՝ ուղղված մի համակարգի դեմ, որը դատական իշխանությունը վերածել է ճնշման, հաշվեհարդարի և լռեցման գործիքի։
Ես իմ աջակցությունն եմ հայտնում հացադուլ հայտարարած Նարեկ Սամսոնյանին, ինչպես նաև նրա համար պայքարող կնոջը և երեխաներին։ Նրանց պայքարը միայն մեկ ընտանիքի պայքար չէ․ դա պայքար է արժանապատվության, արդարության և մարդու հիմնարար իրավունքների համար։
Հացադուլը պարզապես «չուտել» չէ։
Այն ապրելակերպ չէ, փոքր անհարմարություն չէ, կամ սիմվոլիկ քայլ։
Հացադուլում գտնվող բանտարկված մարդու մեկ օրը հաճախ հավասար է շաբաթի, երբեմն անգամ ավելի, երկարատև ֆիզիկական ու հոգեբանական տառապանքի։ Ամեն անցնող ժամ առողջության անդառնալի կորուստ է, իսկ ամեն օր՝ կյանքի հետ անշրջելի հաշվարկ։
Հացադուլը այն պահն է, երբ մարդը գիտակցաբար դնում է իր մարմինը, առողջությունը, կյանքը մի կողմ՝ հանուն արդարության վերականգնման։ Երբ այլևս չեն գործում օրենքը, փաստարկը, խոսքը, և մնում է միայն սեփական մարմինը՝ որպես վերջին փաստարկ ռեժիմի դեմ։
Այն հասարակությունը, որը լռում է կյանքը ռիսկի տակ դրած ապօրինի կալանավորվածի առաջ՝ անկախ իր սեփական ճաշակից, համաձայնությունից կամ անհամաձայնությունից նրա մտքերի հետ, վաղ թե ուշ հայտնվում է նույն համակարգի զոհերի շարքում։ Քանի որ անարդարությունը, որը դիմադրության չի հանդիպում, կամ հանդիպում է ըստ ճաշակի ու ծանոթի, միշտ շատ արագ տեմպերով ընդլայնվում է։
Հ.Գ.
Իմ խորհուրդն է Նարեկին՝ դադարեցնել հացադուլը և պայքարը շարունակել այլ միջոցներով, նույնիսկ եթե դրանք թվան պակաս արդյունավետ, առանց սեփական կյանքը վտանգի տակ դնելու։ Քանի որ այս ռեժիմը արժանի չէ տեսնելու ընդդիմախոսի փոքր տառապանքը։ Վստահ եմ, որ այս լկտի ռեժիմը, տեղեկանալով հացադուլի մասին, ոչ թե կմտահոգվի, այլ կուրախանա այն փաստով, որ իր դեմ խոսող, պայքարող մարդն այսօր առողջական վնասներ է կրում»։