«Մեթա»-ն Թրամփի նախկին փոխխորհրդականին նշանակել է ընկերության նախագահ

«Մեթա»-ն ԱՄՆ-ի նախագահ Դոնալդ Թրամփի ազգային անվտանգության նախկին խորհրդականի տեղակալ Դինա Փաուել Մաքքորմիկին նշանակել է նախագահ և տնօրենների խորհրդի փոխնախագահ։ Այս մասին հայտարարվել է մամուլի հաղորդագրության մեջ։

«Մեթա»-ի հիմնադիր և գործադիր տնօրեն Մարկ Ցուկերբերգն ընդգծել է Մաքքորմիքի փորձը համաշխարհային ֆինանսական համակարգի ամենաբարձր մակարդակներում։

Իր նոր դերում Մաքքորմիքը կաշխատի ընկերության համակարգչային և ենթակառուցվածքային թիմերի հետ՝ վերահսկելով բազմամիլիարդ դոլարանոց ներդրումների իրականացումը։ Նա նաև կղեկավարի ռազմավարական գործընկերություններ ձևավորելու, կապիտալ ներգրավելու և ընկերության ներդրումային ներուժը երկարաժամկետ հեռանկարում ընդլայնելու նոր հնարավորություններ բացահայտելու ջանքերը։

Մաքքորմիքը Թրամփի առաջին ժամկետի ընթացքում ծառայել է՝ որպես ազգային անվտանգության խորհրդականի տեղակալ, նախկինում նախագահ Ջորջ Բուշ կրտսերի օրոք եղել է Սպիտակ տան ավագ խորհրդական և պետքարտուղար Քոնդոլիզա Ռայսի օգնական։ Նա նաև 16 տարի ղեկավար պաշտոններ է զբաղեցրել «Գոլդման Սաքս»-ում։

Նոյեմբերի 6-ին Reuters-ը հաղորդեց, որ Meta-ն, հնարավոր է, իր եկամտի մինչև 10%-ը ստացել է խարդախ գովազդից։ Գործակալության տվյալներով՝ Facebook-ում, Instagram-ում և WhatsApp-ում (երեքն էլ Meta-ի սեփականությունն են) մի քանի տարի շարունակ ամեն օր ցուցադրվել են միլիարդավոր բարձր ռիսկային գովազդներ, և արգելափակման միջոցառումները չեն կարողացել արդյունավետորեն կանգնեցնել հոսքը։