«ՀՀ-ում 100-ից ավելի անձանց նկատմամբ հարուցված գործերը քաղաքական ենթատեքստ ունեն»․ Էլինար Վարդանյան

Փետրվարի 5-ին Ազգային ժողովի պետական-իրավական հարցերի մշտական հանձնաժողովի նիստում քննարկվել է խորհրդարանական ընդդիմության պատրաստած «Հայաստանի Հանրապետությունում քաղբանտարկյալների և նրանց խախտված իրավունքների վերականգնման մասին» Ազգային ժողովի հայտարարության նախագիծը։ Հայտարարության նախագիծը ներկայացրել է ընդդիմադիր «Հայաստան» խմբակցության պատգամավոր Էլինար Վարդանյանը։

«Արձանագրում ենք, որ ՀՀ բազմաթիվ քաղաքացիներ անմեղության կանխավարկածի բացահայտ ոտնահարման պայմաններում՝ զրկվել են ազատությունից կամ հետապնդվում են ոչ թե հանցանքի, այլ իրենց գաղափարների, խոսքի և դիրքորոշման համար, որոնց նկատմամբ առկա է խտրական և տարբերակված մոտեցում․․․»,- նշեց Էլինար Վարդանյանը՝ ընդգծելով, որ այդ մարդկանց իրավունքները շարունակում են խախտված մնալ։

«ՀՀ-ում կան քաղբանտարկյալներ, ինչը լուրջ խնդիր է պետության համար․․․ Մենք ՀՀ-ում ունենք 100-ից ավելի քրեական հետապնդման ենթարկվող անձինք, որոնց նկատմամբ հարուցված գործերը քաղաքական ենթատեքստ ունեն, 40 անձ ՔԿՀ-ներում են և քաղբանտարկյալի կարգավիճակում են, և ունենք գրեթե նույնքան անձինք, որոնց նկատմամբ կիրառվել է խափանման այլ միջոց, սակայն վերջերս շարունակում են հանդիսանալ քաղաքական հալածյալներ»։