«Կտրիճ Ներսիսյանը և իր խմբակը պատերազմի կուսակցության առաջնորդությունն են ստանձնել»․ Նիկոլ Փաշինյան

«Ես կարծում եմ, որ Կտրիճ Ներսիսյանը և իր խմբակը կառավարվում է Պետական անվտանգության կոմիտեի գործակալի խողովակով և տրամաբանությամբ, ես սա երբեք չեմ էլ թաքցրել»,- այս մասին, այսօր ճեպազրույցի ժամանակ հայտարարեց ՀՀ վարչապետ Նիկոլ Փաշինյանը՝ անդրադառնալով հարցին՝ հնարավո՞ր է, որ հոգևորականների դեմ արշավի պատճառը այն է, որ նրանք խոսել են Արցախի մասին։

«Հոգևոր ոլորտում այդ խոցերը խոցելի են դարձնում, որ մարդկանց հեշտությամբ հավաքագրեն և օգտագործեն, ոնց ուզում են։ Սա պետական անվտանգության հարց է։

Երբ երկրի վարչապետը հայտարարում է, որ մենք Ղարաբաղի շարժումը պետք է դադարեցնենք, չի կարող լինի պաշտոնյա, որը շարունակի Ղարաբաղի շարժումը»,ընդգծեց Փաշինյանը։

Նա նաև հավելեց, որ գնացել է պատարագի և պատարագից հնչել է՝ Արցախի Հանրապետություն։ «Դա ի՞նչ է նշանակում, դա նշանակում է պատերազմի կոչ, ուրիշ բան չի նշանակում։ Բա դրա համար ենք ասում, որ Կտրիճ Ներսիսյանը և իր խմբակը պատերազմի կուսակցության առաջնորդությունն է ստանձնել։ Պետք է չլինի այդպիսի բան»,– հայտարարեց Փաշինյանը։