Գառնիկ Քերքոնյանը ՄԱԿ-ում խոսել է արցախցիների իրավունքների և Բաքվում պահվող գերիների մասին

Երեկ Ժնևում ՄԱԿ-ի Մարդու իրավունքների լիագումար նիստում ելույթ է ունեցել Լեռնային Ղարաբաղի ժողովրդի հիմնարար իրավունքների պաշտպանության հանձնախմբի անդամ՝ միջազգային իրավաբան Գառնիկ Քերքոնյանը։

«Լեռնային Ղարաբաղից 150 000 բնիկ հայերի բռնի տեղահանումից հետո, Ադրբեջանը շարունակում է խոչընդոտել նրանց անվտանգ վերադարձը՝ խախտելով ՄԱԿ-ի Միջազգային դատարանի 2023 թվականի նոյեմբերի 17-ի որոշումը: Փաստացի, ընդամենը երկու ամիս առաջ Ադրբեջանը վտարել է Լեռնային Ղարաբաղում մնացած վերջին 11 հայերին:

Բայց սա դեռ ամենը չէ։ Ադրբեջանը շարունակում է ոչնչացնել հայկական մշակույթն ու հոգևոր ժառանգությունը՝ խախտելով ՄԱԿ-ի Միջազգային դատարանի 2021 թվականի դեկտեմբերի 7-ի որոշման պահանջները՝ ձգտելով ջնջել նույնիսկ մեր ժողովրդի Լեռնային Ղարաբաղում ներկայության ապացույցները։ Ադրբեջանն այսօր կամայականորեն կալանավորել է Լեռնային Ղարաբաղի 20 հայերի, ենթարկելով նրանց խոշտանգումների և կեղծ դատավարությունների՝ առանց փաստաբանի կամ նույնիսկ նրանց դեմ ապացույցների հասանելիության։

Կարմիր խաչին վտարելով՝ Ադրբեջանը զրկել է կալանավորներին անկախ մարդասիրական վերահսկողությունից։ Պարոն փոխնախագահ, Լեռնային Ղարաբաղի ընտրված ներկայացուցիչները պատրաստ են մասնակցել Շվեյցարիայի խորհրդարանի կողմից անցյալ տարի պատվիրակված խաղաղության ֆորումին։

Մենք խնդրում ենք Մարդու իրավունքների խորհրդին կանգնել մեր ժողովրդի կողքին, քանի որ մենք ձգտում ենք իրականացնել մարդու ամենահիմնարար իրավունքը՝ մեր հայրենիք վերադառնալու իրավունքը»,- նշել է նա։