«Իրանի ԱԷԿ-ի շուրջ հարվածները կարող են հանգեցնել ռադիոլոգիական խոշոր վթարի»․ Գրոսի

Ատոմային էներգիայի միջազգային գործակալության (ԱԷՄԳ) ղեկավարը «խորը մտահոգություն» է հայտնել վերջին հարվածների կապակցությամբ, որոնք, «առկա տվյալներով», հասցվել են իրանական «Բուշեր» ատոմակայանի մոտակայքում: Այս մասին հաղորդում է CNN-ը։ ԱԷՄԳ-ի գլխավոր տնօրեն Ռաֆայել Գրոսին հայտարարել է, որ վերջին հարվածները տեղի են ունեցել երեքշաբթի երեկոյան։

Քանի որ ատոմակայանը գործող է և պարունակում է «մեծ քանակությամբ միջուկային նյութեր», Գրոսին զգուշացրել է, որ օբյեկտին հասցված վնասը կարող է հանգեցնել «խոշոր ռադիոլոգիական վթարի, որը կազդի Իրանի և հարակից տարածքի վրա»։

Գրոսին կրկին «առավելագույն զսպվածության» կոչ է արել՝ միջուկային վթարի վտանգից խուսափելու համար, և շեշտել է սկզբունքներին հետևելու կարևորությունը, որը ԱԷՄԳ-ն անվանում է միջուկային անվտանգության «յոթ սկզբունքներ»՝ զինված հակամարտության ժամանակ։