Իլհամ Ալիևը «Գերնիկայի խաղաղության և հաշտեցման մրցանակի» է արժանացել

Ադրբեջանի նախագահ Իլհամ Ալիևը «Խաղաղության և հաշտեցման մրցանակի» է արժանացել «Ադրբեջանի և Հայաստանի միջև խաղաղության հասնելու և երկխոսության խթանման ջանքերի» համար։ Այս մասին, ըստ ադրբեջանական լրատվամիջոցների, հայտարարել է ինքը՝ Ալիևը։ «Ես խորին երախտագիտություն եմ հայտնում Գերնիկա-Լումոյի և Պֆորցհայմի քաղաքային խորհուրդներին, Գերնիկայի խաղաղության թանգարանին, «Կասա դե Կուլտուրա» մշակութային կենտրոնին և «Գեռնիկա Գոգորատուզ» խաղաղության հետազոտությունների կենտրոնին՝ ինձ «Գերնիկայի խաղաղության և հաշտեցման մրցանակը» շնորհելու համար՝ ի նշան Ադրբեջանի և Հայաստանի միջև խաղաղության հասնելու և երկխոսության խթանման իմ ջանքերի»,- իր ելույթում նշել է Ալիևը։ «Ես կարծում եմ, որ քաղաքացիական բնակչության դեմ կատարված ցանկացած հանցագործություն մարդկության սկզբունքների խախտում է։ Ես կիսում եմ Գերնիկայի ցավն ու վիշտը և հանդիսավոր կերպով հարգանքի տուրք եմ մատուցում դրա զոհերին»,- հավելել է Ադրբեջանի նախագահը։