«Սոնա Մնացականյանի վրաերթը միակ դեպքը չէ․ 2021-ին ևս վթար է եղել»․ Մարիամ Կանայան

«Մինչև Սոնա Մնացականյանի՝ մահվան ելքով վրաերթը, Փաշինյանի շարասյան մասնակցությամբ եղել են տարբեր դեպքեր»,- այսօր Քաղաքական իրավունքների հայկական կենտրոնի «Քաղաքացին և անարդարադատությունը․ Սոնա Մնացականյանի գործը» թեմայով քննարկման ժամանակ հայտնել է ՔԻՀԿ անդամ Մարիամ Կանայանը։ «2021թ․ մայիսին կրկին վթար է եղել շարասյան մեքենաներից մեկի մասնակցությամբ՝ Վ․ Սարգսյան և Մ. Խորենացի փողոցների խաչմերուկում, որի հետևանքով վիրավորներ են եղել. մեկը բավականին ծանր վիրավորում է ստացել ու երկար բուժվել։ Մեկ այլ դեպք էլ Սոնայի դեպքից մեկ տարի առաջ էր, Կարին Տոնոյանի տեղադրած տեսանյութով, երբ Սյունիք գնալու ճանապարհին կատաղի արագությամբ հանդիպակած դուրս են եկել վարչապետի շարասյան մեքենաները»,- մանրամասնել է բանախոսը՝ ներկայացնելով տեսանյութեր։