«Ամերիկյան էսկադրային ականակրի վրա հրդեհ է բռնկվել». #CBS

Հրդեհ է բռնկվել ամերիկյան USS Higgins էսկադրային ականակրի վրա, որն առաջադրանքներ էր կատարում ԱՄՆ Հնդկա-խաղաղօվկիանոսյան հրամանատարության պատասխանատվության գոտում։ Այս մասին հայտնում է CBS-ը՝ հղում կատարելով անանուն պաշտոնյաներին: Ըստ լրատվամիջոցի՝ միջադեպը տեղի է ունեցել շաբաթվա սկզբին։

«Հրդեհը շարքից հանել է ականակրի էլեկտրամատակարարումը և շարժիչային համակարգը»,- հաղորդում է լրատվամիջոցը։

ԱՄՆ ռազմածովային ուժերի 7-րդ նավատորմի մամուլի ծառայության ներկայացուցիչ Մեթյու Քոմերը հայտնել է, որ «ապրիլի 28-ին, Հնդկա-խաղաղօվկիանոսյան տարածաշրջանում պլանային գործողություններ իրականացնելիս, Arleigh Burke դասի USS Higgins ականակիրը հայտնել է էլեկտրաէներգիայի բաշխման համակարգում տեխնիկական անսարքության մասին: Նավի էլեկտրաէներգիայի անջատում է տեղի ունեցել, ինչը հանգեցրել է քարշուժի կորստի»:

Հայտարարության համաձայն՝ նավի էլեկտրամատակարարումն արդեն վերականգնվել է։ Նշվում է, որ խափանումը «կարող էր ուղեկցվել կայծերով և ծխով»: Անձնակազմի անդամներից ոչ մեկը չի տուժել։