«Բանակը չպետք է խառնել քաղաքականությանը․ դա կվտանգի երկրի սահմանները»․ Նաիրի Հոխիկյան

Լրագրող, հանրային գործիչ Նաիրի Հոխիկյանի գրառումը․ «Որևէ երկրում ընդունված չէ, նույնիսկ չի կարելի բանակի զինտեխնիկան տեղափոխել բաց, չծածկված վիճակում։ Զինտեխնիկայի քողարկված, բրեզենտով ծածկած, թաքուն տեղափոխումը նախևառաջ անվտանգային նպատակով է, որպեսզի ոչ ոք չիմանա, թե ինչ ունի տվյալ երկրի բանակը։
Հայաստանում էլ է այդպես արվել, ու դա նորմալ է։ Բայց վերջին շաբաթներին պարբերաբար տեսնում ենք, որ հատկապես մեծ մայրուղիների վրա օրվա մարդաշատ ժամերին հանկարծ հայտնվում են խոշոր զինտեխնիկա բարձած բեռնատարներ, առանց ծածկելու, այնպես, որ մարդիկ տեսնեն, թե ինչ զինտեխնիկա են տեղափոխում, ռազմական ոստիկանության ուղեկցությամբ, բարձր ձայնային ազդանշաններով ուշադրությունը իրենց վրա են գրավում։
Հասկացող մարդկանց համար ակնհայտ է, որ դա արվում է քարոզչական նպատակներով' առաջիկա ընտրություններին մարդկանց իշխանության կողմը գրավելու համար։ Իբր թե, տեսեք, տեսեք, ինչպիսի զենք է երկիր բերում Նիկոլը։
Իրականում այդ խոշոր զինտեխնիկայի մեծ մասը հնուց մնացած է, որը նորից ներկել են ու հանել մարդամեջ, ժողովրդի աչք են խաբում։
Իսկ ընդհանրապես, բանակը ոչ մի կերպ չպետք է խառնել քաղաքականությանը, քանի որ դա ոչ միայն ամբարոյական է, այլև վտանգում է երկրի սահմանները»: