«ԵԽԽՎ զեկույցով ոչ թե Նիկոլին քարտ են ցույց տվել, այլ դա իրենց սեփական երեսը փրկելու միջոց էր»․ Արմեն Աշոտյան

«Խախտումներն այնքան շատ էին, որ ԵԽԽՎ դիտորդական առաքելությունը սեփական երեսը փրկելու համար չէր կարող դրանք չարձանագրել։ Զեկույցում ընդամենը ճշմարտության մի մասն է, պարզապես այս տարիների ընթացքում այնքան են անտեսել Հայաստանում տիրող իրավիճակը, մարդու իրավունքների նահանջը, քաղաքական հետապնդումները, կեղծիքները և այլն, որ եթե մի փոքր բառ ասում են՝ ոգևորվում ենք»,- դատական նիստից առաջ լրագրողների հետ զրույցում ասաց ՀՀԿ փոխնախագահ Արմեն Աշոտյանը՝ անդրադառնալով Հայաստանում խորհրդարանական ընտրությունների վերաբերյալ՝ ԵԽԽՎ զեկույցին։
«ԵԽԽՎ դիտորդական առաքելության զեկույցը՝ այն ձևակերպումներով, որոնք ընդդիմադիր դաշտի ականջին և իրականությանը համադրելի են, ընդամենը սեփական երեսը, անաչառությունը ցույց տալու միջոց է, այսինքն՝ դա արվել է իրենց խաթր, ոչ թե մեր, և ոչ թե Նիկոլին ինչ-որ քարտ են ցույց տվել, չէ, պարզապես ուզում են ասել, որ իրենց հոգիները, որ ծախվել են սատանային՝ մի 10 տոկոս այդ հոգիների մասնաբաժնից դեռ թողել են առկախված»,- նշեց Աշոտյանը։