«Պետականաշինությունը չի կարող հենվել էմոցիոնալ մանիպուլյացիաների վրա»․ Մհեր Մելքոնյան

ԱԺ նախկին պատգամավոր Մհեր Մելքոնյանի ֆեյսբուքյան գրառումը. «Ժամանակակից պետականաշինության և աշխարհաքաղաքական բարդ մարտահրավերների փուլում Հայաստանի քաղաքական դաշտում շարունակում է խորանալ խորքային մի ճգնաժամ, որը սպառնում է մեր ապագային․ խոսքը քաղաքական անպատասխանատվության, էժանագին պոպուլիզմի և հանրությանը չհիմնավորված խոստումներով մանիպուլացնելու արատավոր պրակտիկայի մասին է։ Պետության առջև ծառացած անվտանգային, տնտեսական և սոցիալական խնդիրները պահանջում են հստակ հաշվարկված ռազմավարություն, լուրջ կարողություններ և քաղաքական կամք, մինչդեռ քաղաքական խոսույթում հաճախ գերիշխող են դառնում մակերեսային թեզերը, էմոցիոնալ ճառերն ու իրականությունից կտրված խոստումները։
Անիրականանալի խոստումների քաղաքականությունն առաջին հերթին քայքայում է հասարակության վստահությունը պետական ինստիտուտների, ընտրական համակարգի և ապագայի նկատմամբ՝ ամեն մի տապալված խոստումով մեծացնելով հանրային ապատիան և օտարելով քաղաքացուն պետական գործընթացներից։ Միևնույն ժամանակ, երբ քաղաքական գործիչները կենտրոնանում են կարճաժամկետ վարկանիշային միավորներ կորզելու վրա, զոհաբերվում են երկարաժամկետ, աննկատ, բայց ֆունդամենտալ բարեփոխումները, իսկ պոպուլիզմը փոխարինում է իրական աշխատանքին՝ հանգեցնելով պետական կառավարման համակարգային անարդյունավետության։
Լուրջ քաղաքականությունը ենթադրում է պատասխանատվություն սեփական խոսքի համար, քանի որ հասարակությանն այլևս պետք չեն «հաճոյախոսություններ» կամ «փրկչական» պաթոս, այլ կա դառն ճշմարտությունն իմանալու և իրատեսական ծրագրեր տեսնելու հստակ պահանջ։ Պետականաշինությունը չի կարող հենվել էմոցիոնալ մանիպուլյացիաների և անիրականանալի սպասումներ ձևավորելու վրա, և ժամանակն է ձևավորելու քաղաքական պատասխանատվության նոր մշակույթ, որտեղ գլխավոր չափանիշը ոչ թե բարձրագոչ ելույթն է, այլ չափելի արդյունքը, պրոֆեսիոնալիզմն ու անկեղծությունը:
Վերջ տվեք անպատասխանատու հայտարարություններին․ մի՛ խաբեք մեր քաղաքացիներին։ Չի՛ կարելի խոսել և խոստանալ այն, ինչը չեք կարողանալու անել»։