«Դրանով ոչ ամրապնդվեց պետության անվտանգությունը, ոչ էլ թուլացավ»․ Արեգ Սավգուլյան

Պատմաբան, «ՀայաՔվե»-ի անդամ Արեգ Սավգուլյանի ֆեյսբուքյան գրառումը. «ԱԱԾ տնօրենի տեղակալ Դավիթ Սանամյանը օգոստոսի 18-ին Սահմանապահ զորքերի ղեկավարության հետ մասնակցել էր 2026-ի առաջին կիսամյակի արդյունքների ամփոփմանը։ Ինչպես երևում է՝ լավ չեն ամփոփել, եթե ողջ հայ-ադրբեջանական սահմանի երկայնքով թաթարական հորդաները լվերի պես թռվռում են։ Սանամյանն այս պաշտոնում նշանակվել էր 1 տարի առաջ, իսկ այսօր ազատվել է վարչապետի որոշմամբ։ Պատճառ նշված չէ, ուրեմն պետք է ընկնենք ենթադրությունների գիրկը։
Պատճառը բնականաբար Շաքիի դեպքն է, ակնհայտ է, որ երկու պետությունների՝ Հայաստանի և Ադրբեջանի իրավապահ մարմինների «համատեղ օպերացիան» տապալվել է և ադրբեջանցի զինծառայող Նասիմ Մուսաևը բացահայտվել է աղմկահարույց միջադեպի արդյունքում, որը ցնցել է ողջ Շաքին, բացի գյուղապետ Ռուբեն Մանուչարյանից, որը տեղից ցնցված էր ի վերուստ։
Արդյունքում ԱԱԾ-ն իմացել է (Ադրբեջանի անվտանգությունն է զգուշացրել), որ իրենց կողմից մարդ է թափանցել, գյուղապետն իմացել է, բայց զինծառայողին վնասազերծել է տնային տնտեսուհին, որից հետո դրան հայտնաբերելը տեխնիկական խնդիր էր։
Հ.Գ. Հայ ժողովուրդն այսօր ավելի հանգիստ կքնի, հատկապես Շաքիի բնակիչները, որովհետև ԱԱԾ պաշտոնյա է ազատվել, մինչդեռ դրանով ոչ ամրապնդվեց պետության անվտանգությունը և ոչ էլ թուլացավ, որովհետև համակարգային փոփոխությունները սարերի հետևում են, իսկ 1-ին պլանում կեղծ խաղաղությունն է»։