Ֆինլանդիայի ԱԳ նախարարը կոչ է արել ԵՄ երկրներին դադարեցնել ՌԴ քաղաքացիներին զբոսաշրջային վիզաների տրամադրումը

Ֆինլանդիայի ԱԳ նախարար Էլինա Վալտոնենը Եվրոմիության երկրներին կոչ է արել դադարեցնել Ռուսաստանի քաղաքացիներին զբոսաշրջային վիզաների տրամադրումը։ Այս մասին հաղորդվում է երկրի արտաքին գործերի նախարարության պաշտոնական կայքում։
Նշվում է, որ նա հանդես է եկել ԵՄ ամբողջ տարածքում վիզային ավելի խիստ ու միասնական քաղաքականության օգտին։
«Քանի դեռ Ռուսաստանը շարունակում է իր ներխուժումը, Ռուսաստանի քաղաքացիներին չպետք է զբոսաշրջային վիզաներ տրվեն։ Ռուսաստանի ագրեսիվ պատերազմն Ուկրաինայի դեմ շարունակվում է արդեն հինգերորդ տարին։ Սխալ է, որ ռուսները կարող են մեկնել Եվրոպա՝ վայելելու այստեղի կենսակերպն ու ազատությունները, այն դեպքում, երբ նրանց երկիրը ռմբակոծում է ուկրաինացիների տները»,- ասել է Վալտոնենը։
Eurostat-ի տվյալների համաձայն՝ չնայած սահմանափակումներին՝ 2025 թվականին Ռուսաստանի քաղաքացիներին տրամադրված Շենգենյան վիզաների թիվը 2024 թվականի համեմատ աճել է 10,2%-ով՝ հասնելով 620 հազարի։ Դրանցից 478 հազարը եղել են զբոսաշրջային վիզաներ, իսկ մնացածը տրամադրվել են ընտանիքի վերամիավորման և ուղևորությունների այլ նպատակներով։