Քաշաթաղի շրջանի Միջնավանն ու Քարեգահը բազմաբնակարան շենքեր կունենան

Քաշաթաղի շրջանի Միջնավան քաղաքային և Քարեգահ գյուղական համայնքներում մեկ հարկանի բազմաբնակարան շենքեր կկառուցվեն: Այս մասին տեղեկանում ենք Արցախի Քաղաքաշինության նախարարությունից:

Միջնավան քաղաքում շենքի շինարարությունն սկսվել է ընթացիկ տարում և կատարվել է պատերի շարվածքը, տանիքի կառուցումը, պատուհանների և դռների տեղադրումը: Այժմ կատարվում է արտաքին սվաղվան, ներքին հարդարման և կոմունիկացիաների մոնտաժման աշխատանքները: Շենքը նախատեսված է 8 ընտանիքի համար, որը կտրամադրվի Միջնավանի երիտասարդ ընտանիքներին: Նորակառույց բազմաբնակարան շենքը շահագործման է հանձնվելու 2018 թվականին:

Նախագծով նախատեսված է բարեկարգել բակը և կառուցել մանկական խաղահրապարակ և ավտոկայանատեղ:

Նույն նախագծով ևս մեկ բազմաբնակարան շենք նախատեսվում է կառուցել շրջանի Քարեգահ համայնքում: Շենքի նախագիծն արդեն պատրաստ է: Ամենայն հավանականությամբ շինարարությունը կմեկնարկի 2018 թվականին:

Ծրագիրը կյանքի է կոչվում «Քաշաթաղ» բարեգործական հիմնադրամի միջոցներով: