Ֆրեզնոյի պետական համալսարանում ուսանողները Հայաստանի պատմություն են սովորում

Ֆրեզնոյի պետական համալսարանը հայտնի է Միացյալ Նահանգներում իր աստղագիտության և գինեգործության ուսումնասիրություններով ու խաղողի այգիներով, որտեղ ուսանողների պատրաստված գինիները վերջին երկու տասնամյակներին շուրջ 300 մրցանակ են ստացել: Հայերի համար Ֆրեզնոյի պետական համալսարանը հայտնի է համալսարանի սրտում կանգնեցված Հայոց ցեղասպանության հուշարձանով ու հայագիտության ամբիոնով: Ամբիոնի ղեկավար Բարլո Դեր Մկրտչյանի խոսքով, հայագիտության նկատմամբ ուսանողների հետաքրքրությունը բարձր է.

«Մեր կենտրոնը դասավանդում է զանազան առարկաներ. Հայերեն լեզվի ու պատմության, արվեստի, գրականության դասեր: Պետք է ասեմ, բավականին շատ է մեր գործը, քանի որ շատ ուսանողներ կան»:

Համալսարանի 24,000 ուսանողներից շուրջ 500-ը հայ են, նշում է Դեր Մկրտչյանն՝ ավելացնելով, որ հայագիտություն ուսումնասիրում են ոչ միայն հայազգի ուսանողներ.

«Նաև ունենք կրթաթոշակներ ուսանողների համար, որպեսզի օգնենք իրենց կրթություն ստանալ»:

Ֆրեզնոյի պետական համալսարանը միակն է, որի կենտրոնում կառուցված է Հայոց ցեղասպանության զոհերի հուշարձան.

«Ամեն օրը ուսանողները քայլում են, անցնում և սովորում Հայոց ցեղասպանության մասին»:

Հուշարձանի սյուներից յուրաքանչյուրն իր նշանակությունն ունի: Առաջինը՝ այժմյան Հայաստանն է, հաջորդը՝ խորհրդանշում է պատմական շրջանները, որտեղ 1915-ին տեղի են ունեցել հայկական ջարդերը: Վերջին սյունը խորհրդանշում է Սփյուռքը:

Հավերժության նշանի տակ պատմական ու ժամանակակից Հայաստանից բերված հող է լցված, այնպես որ, այստեղ կանգնող յուրաքանչյուրը կարող է իրեն Հայաստանի հողի վրա զգալ: Հայաստանից է բերվել նաեւ հուշարձանի առջև տնկած նռան ծառը:

Հուշարձանի քարերին պատկերված են Հայոց պատմության կարևորագույն դրվագները՝ Տիգրան Մեծից մինչեւ Մաշտոց: Նարեկացի, Էջմիածին, Աղթամար, Անի, Կիլիկիո թագավորություն՝ պատմության բոլոր էջերն այստեղ են, Ֆրեզնոյի պետական համալսարանի սրտում. այս մասին հայտնում է Ամերիկայի ձայնը: