Զոհրաբ Մնացականյանը՝ Վ. Պուտինի՝ Ռ. Քոչարյանին այցելելու հնարավորության մասին

«Այդ «եթե» կոնտեքստն ինձ որևէ կերպ չի հրապուրում մեկնաբանելու, թե եթե այնպես, ուրեմն ինչպես։ Մենք պատրաստվում ենք գագաթնաժողովին, և երկու կողմից կա հստակ նպատակ՝ խորացնելու առկա օրակարգը և հարաբերությունները». ԱԳՆ-ում հրավիրված մամուլի ասուլիսում հայտարարեց ՀՀ արտաքին գործերի նախարար Զոհրաբ Մնացականյանը՝ ի պատասխան այն հարցի, թե մտավախություն չունե՞ն, որ ՌԴ նախագահ Վ. Պուտինը կարող է ցանկություն հայտնել այցելել կալանքի տակ գտնվող Ռոբերտ Քոչարյանին, և դա ի՞նչ կերպ կարող է ազդել դիվանագիտական հարաբերությունների վրա:

Նախարարն ասաց, որ Հայաստանի և Ռուսաստանի միջև միջպետական հարաբերությունները բավական ամուր հիմքեր ունեն և չկա որևէ տարաձայնություն:

«Ունենք որոշ դատական, իրավական բնույթի գործընթացներ, սակայն միջպետական մակարդակով Հայաստանն ու Ռուսաստանը կարող են և ունակ են պահպանել այն կարևոր օրակարգը, որի հիմքում է մեր երկրների դաշնակցային հարաբերությունների խորացնելու նպատակը։ Հարցերի փոխկապակցվածություն որևէ կերպ գոյություն չունի և չի կարող ունենալ»,- նկատեց արտգործնախարարը։ Նա համոզմունք հայտնեց, որ հոկտեմբերի 1-ի ԵԱՏՄ գագաթնաժողովը լինելու է արդյունավետ, և դրանից շահելու են նաև հայ-ռուսական հարաբերությունները: