«ՍԴ որոշումից նշանակում է, որ կալանավորումն առհասարակ չէր կարող կիրառվել, և Ռոբերտ Քոչարյանն անհապաղ պետք է լինի ազատության մեջ». Ռ. Քոչարյանի պաշտպանական խումբ

Ինչպես արդեն հայտնել էինք, ՀՀ երկրորդ նախագահ Ռոբերտ Քոչարյանի փաստաբանական թիմը միջնորդություններ է ներկայացրել Երևան քաղաքի ընդհանուր իրավասության դատարան։

Միջնորդությունները վերաբերում են Ռոբերտ Քոչարյանի խափանման միջոց կալանքն անհապաղ վերացնելու և քրեական հետապնդումը դադարեցնելուն։

Մինչ այդ՝ սեպտեմբերի 7-ին Հայկ Ալումյանն ու Արամ Վարդևանյանը հանդես են եկել մամուլիս ասուլիսով: Ըստ Հ. Ալումյանի՝ ՍԴ որոշման իրավական դիրքորոշումից հետևում է, որ առ այս պահը Քոչարյանը կալանքի տակ է գտնվել ապօրինաբար, ապօրինի է նաև քրեական հետապնդումը:

«ՍԴ-ն արձանագրել է, որ չկա մի մարմին և ընթացակարգ, որից կարելի կլինի հետևության գալ, որ պաշտոնաթող նախագահին որևէ քրեական գործով վերագրվող գործողությունները բխում են նրա կարգավիճակից, կամ ոչ: Ուստի՝ եթե չկա այդ մարմինը, որը կարող է այդ հարցին պատասխան տալ, ուրեմն՝ չի կարող օրինական լինել որևէ դատարանի որոշում, որտեղ ասված լինի՝ Ռ. Քոչարյանի կարգավիճակից չի բխել այն, ինչ նրան այսօր վերագրվում է»,- հայտարարեց փաստաբանը:

Պաշտպանական խմբի մյուս անդամը՝ Ա. Վարդևանյանն էլ նշեց, որ 2-րդ նախագահը չէր կարող կարող կալանավորվել, ավելին՝ որպես մեղադրյալ չէր կարող ներգրավվել: «Քրեադատավարական օրենսգիրքը» դրա համար հստակ կառուցակարգեր չի նախատեսել:

«Օրենսդրական բացն այն աստիճանի է, որ նման կարգավիճակով օժտված անձի նկատմամբ չի կարող նման գործողություն լինել»: Նա մեջբերեց որոշման 22-րդ էջի հատվածը.

«Հաշվի առնելով Օրենսգրքի 135-րդ հոդվածի 2-րդ մասի ընդհանուր բնույթը և Օրենսգրքի 35-րդ հոդվածում օրենսդրական բացի առկայությունը՝ դատական պրակտիկան չէր կարող ապահովել այդ դրույթի կիրառումը՝ Սահմանադրության ուժով հատուկ պաշտպանությամբ օժտված պաշտոնատար անձանց նկատմամբ՝ նկատի ունենալով նրանցից յուրաքանչյուրի կարգավիճակի առանձնահատկությունները և դրանով պայմանավորված՝ անձեռնմխելիության բովանդակային տարբերությունները, ինչն անհնար էր բացահայտել հստակ ամրագրված և տարբերակված պոզիտիվ-իրավական ձևակերպումների բացակայության պայմաններում»:

Ըստ փաստաբանի՝ սա նշանակում է, որ առհասարակ կալանավորումը չէր կարող կիրառվել և որ ՍԴ-ն արձանագրում է, որ 35-րդ հովածի հետ կապված քննարկելու հարց չկա, որովհետև 35-րդ հոդվածի բացն այն աստիճան մեծ է, որ այստեղ հարց չի առաջանում, քանի որ չկան նորմատիվային կարգավորումներ:

Ա. Վարդևանյանը պնդեց, որ օրենսդրական բացի մասին նշել են ոչ միայն փաստաբանները, այլև Վճռաբեկ դատարանի քրեական պալատի դատավոր Սերժիկ Ավետիսյանը, որն անցյալ տարվա նոյեմբերի 15-ին առաջարկել էր դիմել ՍԴ:

ՍԴ-ին դիմելու անհրաժեշտության մասին տևական ժամանակ խոսվում էր, սակայն դա համառորեն չէր արվում:

Փաստաբանը մեջբերեց իր գործընկեր Վլադիմիր Վարդանյանի գնահատականը, որով նա ՍԴ որոշումը համեմատել է ՄԻԵԴ որոշման հետ:

Պաշտպանական խմբի անդամ Ա. Վարդևանյանը հայտարարեց. ««Երևան» կենտրոն քրեակատարողական հիմնարկում գործառույթային անձեռնմխելիությամբ երաշխավորված, Սահմանադրության ուժով պաշտպանված, որևէ կերպ չհաղթահարված անձ է պահվում: Սա նշանակում է, որ կա իրավունքի և սահմանադրական պահանջի կոպտագույն խախտում, քանի որ անձեռնմխելիություն բառը և քրեակատարողական հիմնարկը միմյանց բացառում են: Եվ ես հիմա վստահորեն կարող եմ պնդել, որ Սահմանադրության 27-րդ հոդվածի խախտումն առավել քան հստակ է, և Ռոբերտ Քոչարյանը անհապաղ պետք է լինի ազատության մեջ»: