«ԱԱԾ-ն պետք է բացահայտի «Դիանայի» քույրիկներին ու հայրիկներին». Անդրանիկ Քոչարյան

«Պարզ դարձավ, որ «Դիանան» Հայաստանում ներքին լարվածություն առաջացնելուն ուղղված գործունեություն է ծավալել նաև 2016թ. Ապրիլյան պատերազմի ժամանակ, որը նախկին իշխանությունների կողմից թողնվել է անհետևանք, ինչը հարցեր է առաջացնում»,- այսօր «Առաջին լրատվականի» եթերում ասել է ԱԺ Պաշտանության և անվտանգության հարցերի մշտական հանձնաժողովի նախագահ Անդրանիկ Քոչարյանը:

Նրա խոսքով՝ ԱԱԾ-ն այժմ պետք է պարզի նրա առնչությունը այս կամ այն երկրների հատուկ ծառայությունների հետ. «Գուցե նաև հայաստանյան ֆեյքերի խմբերի մեջ է ներգրավված, որոնք, պարզվում է, մինչև հիմա կենսունակ են: Եթե նախկինում նրան ձեռք չեն տվել և հիմա շատ արագ հայտնաբերվեց, նշանակում է, որ նա ինչ-որ համակարգի մեջ ներգրավված է, որը շատ արագ հնարավոր եղավ բացահայտել: Ես տողատակերով եմ խոսում, ինքս էլ հետագայում կհասկանամ, թե այդ համակարգերը ինչպիսի առնչություն են ունեցել նախկին իշխանությունների հետ նրանց պաշտոնավարման ընթացքում և հիմա ինչպես օգտագործվեցին ի վնաս մեր երկրի կայունության»,- ասել է Քոչարյանը:

Նա նշել է, որ կարծում է, որ ԱԱԾ-ն այս ընթացքում կիրականացնի միջոցառումներ ու կբացահայտի «Դիանայի քույրիկներն ու եղբայրներին» և նրանց «հայրիկներին», և այն, թե նրանք ինչպիսի քաղաքական դիմագիծ կարող են ունեցած լինել: