«Ոնց որ տրակտորի կոշով ուզենաս մեխ խփել»․ Գեմաֆին Գասպարյան

Աշխատանքի և սոցիալական հարցերի նախարարի նախկին տեղակալ Գեմաֆին Գասպարյանը ֆեյսբուքյան իր էջում գրում է․ «Հեռախոսների «սև» շուկան վերահսկելու նպատակով բոլորի հեռախոսներին տոտալ վերահսկողություն սահմանելն ու «երրորդ կողմին» տվյալների ամբողջական բազա տրամադրելը նաև այդ տվյալները կոմերցիոն նպատակներով օգտագործելու համար ոչ միայն տրամաբանական չէ, ոչ միայն ազատությունների ոչ համաչափ սահմանափակում է, անձնական կյանք երկու ոտքով ներխուժելու փորձ, ոչ միայն անձնական տվյալների արտահոսքի մեծագույն վտանգ է, այլև ոնց որ տրակտորի կոշով ուզես մեխ խփել։
ՌԴ-ն էլ էսօր նույն կարգավորումն ստորագրեց, ու տենց՝ Պակիստան, Թուրքիա, Ադրբեջան, Իրան, Եգիպտոս և այլ «ժողովրդավարական երկրների» ցանկին միացավ, հիմա մեր հերթն է։
Տեսնես ԵՄ երկրների մտքով ինչի՞ չի անցել նույնն անել, գուցե հակասում է իրենց օրենսդրությանը, հը՞, իսկ մենք մեր ստանձնած պարտավորություններին չենք հակասո՞ւմ, մենք ո՞ւր էինք գնում, եթե չեմ սխալվում ոչ դեպի «մեծ եղբայրը հետևում է քեզ» կոնցեպտով պետություն դառնալուն։
Մենք ույղուր չենք ու Չինաստանում չենք ապրում՝ պետությունը իր չափերը պիտի ճանաչի, որ չափն անցնում է, անչափ չի դառնում։
Հույս ունեմ ԲՏԱ նախարարությունը լայն և բազմակողմանի քննարկումների արդյունքում հեռախոսների «սև» շուկան վերահսկելու ավելի խելամիտ ձև կգտնի (եթե իսկապես էդ է նպատակը) ու կպատռի IMEI գրանցելու ու պահելու այս նախագիծը»։