«Փոխնախարարը խոստացավ նորից հանդիպել ու կոնկրետ առաջարկություններ անել»․ չընդունված դիմորդի ծնող

«Իմ և պարոն Թամրազյանի կողմից շատ մանրամասնորեն քննարկվել է ցանկացած խնդիր, եղել են առաջարկություններ, որոնք իմ կողմից չեն ընդունվել, բայց նա կառուցողական մոտեցավ այս խնդրին և խոստացավ, որ վաղը տեղյակ կպահի, նորից կունենանք հանդիպում, և արդեն կոնկրետ առաջարկություններ կանի»,- այս մասին ԿԳՄՍ փոխնախարարի հետ հանդիպումից հետո լրագրողներին հայտնեց չընդունված դիմորդի ծնողը։

Նա նշեց, որ հավելյալ տեղերի վերաբերյալ իրենց պահանջը շարունակում է մնալ ուժի մեջ։

«Ուրիշ տարբերակ չկա, եթե ասում են՝ սահմանափակ ա, էլ տեղ չկա, ուրեմն մենք մենակ դա ենք պահանջում։ Հիմա իրանք կարող ա ուրիշ տարբերակներ էլ առաջարկեն, էդ վաղը պարզ կլինի։ Էդ տարբերակները ես, բնականաբար, մեր երեխաների ու ծնողների հետ կքննարկեմ, և եթե ձեռնտու տարբերակ լինի, կհամարենք դա հարցի լուծում»,- ասաց ծնողը։
Հարցին, թե վաղը որ ժամին են պատրաստվում կրկին հանդիպել, պատասխանեց, որ առայժմ ինքն էլ տեղյակ չէ։

Հիշեցնենք, որ այսօր կառավարության շենքի դիմաց չընդունված դիմորդներն ու նրանց ծնողները բողոքի ակցիա էին կազմակերպել։ Կառավարությունից որևէ արձագանք չստանալուց հետո նրանք շարժվեցին դեպի ԿԳՄՍ նախարարություն։