Հինգշաբթի, 28 մարտի, 2024 թ.
|
Ստեփանակերտում`   +8 °C

«Սորոսի դեմ իրենց խաչակրաց արշավանքներով աչքի են ընկնում միայն կրթական ցածր ցենզ ունեցող խավերը». Հայկ Մարտիրոսյան

«Սորոսի դեմ իրենց խաչակրաց արշավանքներով աչքի են ընկնում միայն կրթական ցածր ցենզ ունեցող խավերը». Հայկ Մարտիրոսյան
320
Երեքշաբթի, 11 օգոստոսի, 2020 թ., 00:20

Քաղաքագետ Հայկ Մարտիրոսյանը ֆեյսբուքյան իր էջում գրել է. «Մենք կանգնած ենք լրջագույն մարտահրավերների առջև, բայց զբաղված ենք ամոթալի հիմարաբանություններով...

Նախ՝ «սորոսականությունը» կեղծ օրակարգ է: Տերմինն ու Հունգարիայից ներգաղթյալ ամերիկյան ֆինանսիստ-ավանտյուրիստ և ֆինանսական մանիպուլյատոր Ջորջ Սորոսի սատանայացման թեման սկսվել է Ռուսաստանում՝ որպես Արևմուտքի դեմ պայքարի արդյունավետ միջոց, հետո՝ տարածվել աշխարհով մեկ:

Սորոսի դեմ իրենց խաչակրաց արշավանքներով աչքի են ընկնում միայն կրթական ցածր ցենզ ունեցող հասարակությունների կրթական ցածր ցենզ ունեցող խավերը միայն:

Օրինակ՝ ճապոնացիները, կորեացիները, նորվեգացիները կամ նորզելանդացիները խորապես թքած ունեն թե՛ Սորոսի և թե՛ Սորոսի դեմ պայքարողների վրա:

Զարգացած հասարակություններում հասկանում են, որ նման կեղծ և մտացածին օրակարգերն այլոց խնդիրներ լուծելուն են ծառայում: Իսկ Հայաստանում նախկին ռեժիմը մի կողմից և տգետ հայհոյիչների բանակները մյուս կողմից ֆինանսական մախինատորի անձը դարձրել են համաշխարհային գործոն և սեփական քաղաքականությունում այդ երևույթը դարձրել կարևորագույն հանգամանք, որ գործածում են որպես խարան և որպես քաղաքական վարկաբեկման հանգամանք: Եվ որպես կանոն՝ անտեղի ու սխալ հասցեով:

Եվ հետաքրքիր է, որ հասարակական առանձին մի խմբի խելագարությունն այնտեղ է հասել, որ Լևոն Տեր-Պետրոսյանի գաղափարներով ներշնչված, դրանցով ներծծված և այսօր իշխանությունում հայտնված մարդկանց գաղափարական իրական արմատները Հայաստանի առաջին ռեժիմում փնտրելու փոխարեն՝ այն Ուոլլ Սթրիթի մի միլիարդատեր մախինատորի մեջ են տեսնում: «Լևոնիստներ» որակելու փոխարեն՝ «սորոսականներ» են պիտակավորում: Ընդ որում՝ բոլորին ում դեմ են, ում չեն հավանում: Եվ անգամ նրանց, ովքեր լինելով իսկական հայրենասերներ, դրա մասին չեն բղավում և ազգայինը դավանելով ու պաշտպանելով՝ մերժում են ազգայնամոլությունն ու միայն խավարամիտներին հատուկ կույր շովինիզմը:

Քիչ առաջ իմացա, որ հիմա ես էլ եմ «սորոսական»: Այն, որ Արա Պապյանին էին մեղադրում «սորոսական» լինելու մեջ, լսել էի: Որ ես էլ եմ՝ հենց նոր իմացա: Նախ՝ Պապյանը բազմիցս է բացատրել, որ իր «Մոդուս Վիվենդի»-ի անվամբ նույնանուն կազմակերպություն են բացել, ամենայն հավանականությամբ, մի խումբ կեղծարարներ և ստացել գրանտ այդ հիմանդրամից: Պապյանն ինքը կամ իր կենտրոնը ոչ մի սենթ գրանտ որևէ մեկից և երբևէ չեն ստացել:

Ինչ վերաբերում է ինձ՝ ծիծաղելի է արդարանալը, բայց որևէ կապ, ընդհանրապես որևէ կապ Սորոսի կամ հիմնադրամի հետ ես երբևէ չեմ ունեցել: Երբևէ կյանքում որևէ գրանտ չեմ ստացել, որևէ կազմակերպության կողմից չեմ ֆինանսավորվել, որևէ քաղաքական, ագիտացիոն կամ մութ պատվեր երբևէ չեմ կատարել:

Ինձ «սորոսական» հռչակողները պետք է ամաչեն սեփական գոյությունից: Կարելի է լինել տգետ և չտեղեկացված, բայց դյուրահավատ դավադրապաշտ և միաժամանակ զրպարտիչ զազրախոս լինելն իրոք որ ամոթալի գոյություն է:

Այն վիճակը, որում մենք հանյտնվել ենք, իրոք ամոթալի է: Որպես իմաստուն ազգ և ժողովուրդ՝ այսքան ցածր գլորվելու իրավունք մենք չունենք:

Մենք կանգնած ենք լրջագույն մարտահրավերների առջև, բայց զբաղված ենք ամոթալի հիմարաբանություններով և կարդում ու լսում ենք մի խումբ ապիկար անգրագետների, որոնք Հայաստանում մարտնչող տգիտության դիկտատուրա են հաստատել:

Ամոթ է... Ե՞րբ ենք սթափվելու: Ե՞րբ ենք հասկանալու, թե ինչի առջև ենք կանգանծ և ինչով ենք զբաղված...»: