«Իմ տարիներն էլ այդքան շատ չեն. անհամբեր սպասում եմ՝ երբ կավարտվի կարանտինը». Ռաֆայել Քոթանջյան

Այսօր ՀՀ ժողովրդական արտիստ Ռաֆայել Քոթանջյանի ծննդյան օրն է. սիրված դերասանը դառնում է 78 տարեկան:

MAMUL.am-ի թղթակցի հետ զրույցում դերասանն ասաց, որ տրամադրությունը բարձր է, իրեն շատ լավ է զգում, բազմաթիվ շնորհավորանքներ է ստացել, դրանցից «վերցրել ամենաօգտակարները»:

Հարցին, թե ինչո՞վ է զբաղվում վերջին շրջանում և ինչի՞ն նվիրում ժամանակը, պատասխանեց, որ շարունակում է ակտիվ կյանք վարել. «Ակտիվ գործունեություն եմ վարում, մասնակցում եմ բոլոր այն միջոցառումներին, որոնք հետաքրքիր են ինձ: Այդ առումով ես անմասն չեմ մնում... Երեկ չէ առաջին օրը գնացինք վարչապետի կազմակերպած համերգին՝ բնության գրկում, սիմֆոնիկ նվագախմբի, հայ երաժիշտների մասնակցությամբ: Երբ որ ինձ հարցնում են, թե վերջին շրջանում ինչո՞վ ես զբաղված, ասում եմ՝ այսպիսի միջոցառումների մասնակցելով, որտեղ նաև իմ մասնակցությունը կա որոշ առումով. դա ինձ համար ամենահաճելի պահերից մեկն է:

Ուզում եմ խոստովանել, որ այդ օրը ես զգացի՝ վարչապետի գործը շատ կարևոր էր. արվեստը, Զինված ուժերը՝ միահամուռ, կազմակերպված... կլինի՝ արվեստ, բանակ, թե այլ ասպարեզ, շատ կարևոր է այդ միասնությունը, համախմբվածությունը...»:

Հարցին, թե ի՞նչն է այսօր ամենից շատ անհանգստացնում նրան, պատասխանեց. «Բնականաբար, այս կարանտինային վիճակը, որ չգիտես ինչքան կձգվի՝ մեկ տարի, երկու տարի, 10 տարի. բայց իմ տարիներն էլ այդքան շատ չեն... ես չեմ կարող ասել՝ 10 տարի հետո գործ կանե՞մ. ես անհամբեր սպասում եմ, թե երբ այս ամենը կավարտվի՝ անցնեմ գործի»:

Իսկ թե ի՞նչը կփոխեր սիրված դերասանն իր ապրած կյանքում, կանցնե՞ր արդյոք նույն ճանապարհները, Ռաֆայել Քոթանջյանը կարճ պատասխանեց. «Ոչինչ չէի փոխի»:

Դիմելով քաղաքացիներին՝ նա հորդորեց. «Երբ որ կարանտինը հանվեց, ուշադիր եղե՛ք, որտեղ որ կտեսնեք իմ մասնակցությամբ միջոցառումներ, առիթը բաց չթողնեք, անպայման եկեք»:

Կենսագրություն

Ռաֆայել Քոթանջյանը ծնվել է Թբիլիսիում, 1942 թվականի սեպտեմբերի 9-ին: 1946 թվականին տեղափոխվել է Երևան։

1960- 1964 թվականներին սովորել է Երևանի գեղարվեստա-թատերական ինստիտուտի դերասանական ֆակուլտետում։

1964-1966 թվականներին որպես դերասան և ռեժիսոր աշխատել է Զանգեզուրի Շիրվանզադեի անվան թատրոնում։ 1966-1968 թվականներին եղել է «Արշալույս» երիտասարդական թատրոնի դերասան։ 1968-1970 թվականներին հաճախել է հեռուստատեսային ռեժիսուրայի բարձրագույն կուրսերի Մոսկվայում։ 1970-1993 թվականներին աշխատել է Երևանի Հրաչյա Ղափլանյանի անվան դրամատիկական թատրոնում՝ որպես դերասան և ռեժիսոր։
1980թ. արժանացել է ՀԽՍՀ վաստակավոր արտիստի կոչմանը:
2003թ. արժանացել է ՀՀ ժողովրդական արտիստի կոչմանը, ՀՀ մշակույթի նախարարության ոսկե մեդալի և ՀՀ Մովսես Խորենացու մեդալի:
2008 թվականից Բնության և հասարակական գիտությունների միջազգային ակադեմիայի իսկական անդամ է:
2009թ. ստացել է Գյումրու պատվո և նվիրվածության շքանշան։ Երևանի պատվավոր քաղաքացի (2016)[2
«Հայրենիքին մատուցած ծառայությունների համար» 1-ին աստիճանի շքանշան:
Մասնագիտական գործունեության ընթացքում Ռ. Քոթանջյանը բազմիցս արժանացել է Խորհրդային Միության և ԱՊՀ երկրների մրցանակների: