«Կխնդրեմ բժշկական գաղտնիք պարունակող տվյալներ չհրապարակել ու նման հարցեր չտալ». նախարար

Կառավարության նիստից հետո լրագրողների հետ ճեպազրույցում Առողջապահության նախարարն անդրադարձել է AstraZeneka-ի վերաբերյալ մտահոգություններին ու նաև պատասխանել հարցին՝ արդյոք պաշտոնյաները կորոնավիրուսի դեմ պատվաստվել են. «Մենք ուշադրությամբ հետևում ենք բոլոր այն զարգացումներին, որոնք տեղի են ունենում բոլոր պատվաստանյութերի հետ կապված: Շաբաթական ամփոփումներ ենք անում: Ուրբաթ նորից կլինի ժողով, որտեղ կքննարկվի նաև Գերմանիայում իրականացված փոփոխությունը՝ ցուցումների մեջ, որ տարիքային շեմը բարձրացվել է, ըստ այդմ՝ մեր գործողությունները կառուցենք»,- ասել է Անահիտ Ավանեսյանը: Հարցին՝ արդյո՞ք իշխանության ներկայացուցիչները կորոնավիրուսի դեմ պատվաստվել են, նախարարը պատասխանել է. «Պաշտոնատար այն անձինք, ովքեր կցանկանան հրապարակել իրենց պատվաստման ընթացքը, ինֆորմացիան, կհրապարակեն, մենք էլ կկիսվենք»:

Լրագրողներն անդրադարձել են նաև մամուլի հրապարակումներին, ըստ որի՝ նախարարի մայրը պատվաստվել է ռուսական «Սպուտնիկ V»-ով. «Կխնդրեմ բժշկական գաղտնիք պարունակող տվյալներ չհրապարակել ու նման հարցեր չտալ»,- նշել է նախարարը: