«Առողջապահության նախարարն անլուրջ «կռուտիտ» է անում». Նաիրա Զոհրաբյան

ԲՀԿ-ական պատգամավոր Նաիրա Զոհրաբյանը ֆեյսբուքյան իր էջում գրել է. «Խաբել Պուտինին. ես չեմ հավատում, թե Նիկոլը չգիտեր՝ «Սպուտնիկ V» ռուսական պատվաստանյութը Հայաստանում գրանցված չէ։ Գիտեր։ Բայց ՌԴ նախագահին ասաց՝ գրանցված է։

Առողջապահության նախարարն անլուրջ «կռուտիտ» է անում, երբ իրավիճակը փրկելու համար ասում է՝ գրանցված չէ, բայց թույլատրված է։ Սա իրավական նոնսենս է։

Մեզ պարտադրված Astra Zeneca պատվաստանյութն Առողջապահության համաշխարհային կազմակերպության հաստատմամբ ևս թրոմբոզ է առաջացնում և արդեն տասնյակ մահերի պատճառ է դարձել։

Եվրոպական 11 երկրներ մեկը մյուսի հետևից հրաժարվել են Astra Zeneca-ից, ու դեռ պիտի հասկանալ, ով և ինչու մեր վզին փաթաթեց կասկածելի պատվաստանյութն ու թույլ չի տալիս գրանցել ռուսականը։

Առաջարկս հստակ է՝ հանրային ճնշմամբ ստիպել չեղարկել Astra Zeneca-ով պատվաստումները, գրանցել ռուսական «Սպուտնիկ V»-ն և սկսել մասսայական պատվաստումներ, քանզի ռուսական պատվաստանյութի հետ կապված ռիսկերը նվազագույնն են։

Պատրաստ եմ լինել ռուսական պատվաստանյութի առաջին փորձարկողներից մեկը։

Իսկ Astra Zeneca-ի լոբբիստներին առաջարկում եմ ուղիղ եթերով այդ պատվաստանյութով պատվաստվել անձանբ՝ իրենց ընտանիքների հետ միասին։

Ի դեպ, Astra Zeneca-ի անունը փոխել են և հիմա համաշխարհային շուկայում այն վաճառվում է նաև «Վաքսերվիա» անվամբ, ինչը չի փոխում դրա վնասակարությունը»։