Թբիլիսիում հանրահավաքների ժամանակ ավելի քան 100 մարդ է ձերբակալվել

Թբիլիսիում տեղի ունեցած ակցիաների ժամանակ՝ իրավախախտումների համար ավելի քան 100 մարդ է ձերբակալվել, հայտնել է Վրաստանի ՆԳՆ-ը:
«Այս փուլում վարչական իրավախախտումների համար ձերբակալվել է 100 մարդ, որոնցից 68-ն ազատ է արձակվել ստորագրության դիմաց, իսկ 32-ը մնում են ժամանակավոր կալանքի տակ»,- ասված է նախարարության կայքում զետեղված հայտարարության մեջ:
Գերատեսչության տվյալներով՝ ոստիկանությունը նաև 2 մարդու է ձերբակալել քրեական իրավախախտման՝ լրագրողի վրա հարձակվելու և ոստիկանական մեքենայի ապակին կոտրելու համար:
Հիշեցնենք՝ հուլիսի 1-ին Թբիլիսիում սկսվել է «արժանապատվության շաբաթը», որի ընթացքում ԼԳԲՏ համայնքի ներկայացուցիչները մի շարք միջոցառումներ են անցկացրել: Սեռական փոքրամասնությունների հակառակորդներն առավոտից սկսել են հակաակցիաներ իրականացնել՝ փակելով Ռուսթավելի կենտրոնական պողոտան։