«Ինչո՞ւ է ՀՀ-ում պատվաստումների թիվն այսքան ցածր». Վահե Տեր-Մինասյան

Ուռուցքաբան-գինեկոլոգ Վահե Տեր-Մինասյանը ֆեյսբուքյան իր էջում գրել է. «Երկու տարի առաջ՝ այս օրերին, երբ դեռ աշխարհը չգիտեր COVID կոչվող չարիքի մասին, մենք հնարավոր բոլոր միջոցներով աշխատում էինք ազգաբնակչության մեջ հավատ ներշնչել բոլոր պատվաստումների հանդեպ։ Այդ նույն ժամանակ որոշ «գործիչներ», ցավոք սրտի, անգամ առողջապահական ոլորտը ներկայացնող, կա՛մ բերանները ջուր առած նայում էին այն անազնիվ խաղին, որ տարվում էր պետական ծրագրերը հնարավորինս վարկաբեկելու համար, կա՛մ, որ ավելի վատ, իրենց վարձու շնիկներին քսի էին տալիս...

Մենք դեռ այն ժամանակ զգուշացնում էինք, որ մի օր, մեզ բոլորիս պետք կլինի բնակչության հավատն ու վստահությունը, որը էժան խաղերի ու փոքրիկ շահերի համար չէր կարելի զոհաբերել։

Ու հիմա կրկնակի զարմանքով եմ նայում այն «զարմացած» դեմքերին, որոնք ոչ մի կերպ չեն կարողանում ընկալել, թե ինչո՞ւ մարդիկ չեն վստահում և ինչո՞ւ է Հայաստանում պատվաստումների թիվն այսքան ցածր։

Գիշերը լա՞վ եք քնում...»: