Իլոն Մասքը հնարավոր է համարել բիթքոյնով #Tesla էլեկտրոմոբիլների վաճառքը

Էլեկտրոմոբիլներ արտադրող Tesla ամերիկյան ընկերության ղեկավար Իլոն Մասքը հնարավոր է համարել, որ ընկերությունը կարող է կրկին մեքենաներ վաճառել բիթքոյնով, հայտնում է Reuters-ը:

Ելույթ ունենալով B-Word համաժողովում՝ Մասքն ընդգծել է, որ բիթքոյնի արդյունահանման ժամանակ ավելի ու ավելի հաճախ են սկսել օգտագործել վերականգնվող էներգիայի աղբյուրները: Նա հույս ունի, որ այս կրիպտոարժույթի արդյունաբերությունն առնվազն 50%-ով հիմնված է կանաչ էներգիայի վրա:
«Եթե դա իսկապես այդպես է, ապա Tesla-ն, ամենայն հավանականությամբ, կրկին բիթքոյն կընդունի»,-հայտարարել է գործարարը:
Հիշեցնենք՝ մայիսին Մասքը հայտարարել էր, որ Tesla-ն դադարեցնում է բիթքոյնների ընդունումը՝ դրա արդյունահանման ոչ էկոլոգիապես մաքուր մեթոդների պատճառով։
Հունիսի կեսերին Մասքը նշել էր բիթքոյնով Tesla ավտոմեքենաների վաճառքի պայմանները: Այդ ժամանակ նա նույնպիսի պահանջ էր ներկայացրել՝ հայտարարելով, որ կրիպտոարժույթը պետք է էկոլոգիապես ավելի մաքուր դառնա: