«Պետք է հասկանանք՝ «Հայաստան» հիմնադրամի գումարներն ո՞ւր են գնացել». Հայկ Մամիջանյան

«Հայաստան» համահայկական հիմնադրամի կողմից հավաքագրված և ՀՀ պետական բյուջե փոխանցված միջոցների օգտագործումն ուսումնասիրող քննիչ հանձնաժողովի նիստի ժամանակ ընդդիմադիր խմբակցության պատգամավոր, ֆինանսավարկային և բյուջետային հարցերի հանձնաժողովի նախագահի տեղակալ Արծվիկ Մինասյանն ասաց. «Եթե կան չարաշահումներ, մեր նպատակն է՝ անչառ, օբյեկտիվ բացահայտել ամբողջ տեղեկատվությունը: Եթե կան խախտումներ, բացահայտել դրանք և մեղավորներին առաջադել պատասխանատվության, վերականգնել միջոցները և փորձել նպաստել «Հայաստան» համահայկական հիմնադրամի հեղինակության աճին»:

Լրացնելով գործընկերոջ խոսքը՝ Հայկ Մամիջանյանն ասաց. «Եթե մենք վերջնականապես հանգենք այն գաղափարին, որ այդ 52,7 միլիարդն ամբողջությամբ գնացել է «ընդհանուր կաթսա», ապա ընդհանուր կաթսայի բոլոր ծախսերը նայելու խնդրի առաջ ենք կանգնում, որովհետև հետ կանգնել չենք կարող, քանի որ որոշել ենք՝ պետք է հասկանանք էդ փողն ուր ա գնացել: Այսինքն՝ այս տրամաբանությամբ, մենք ամբողջ բյուջեի ծախսը, հիմա չասեմ՝ կասկածի տակ ենք դնում, բայց տող առ տող գնում ենք՝ «իսկ եթե դուք փող չունեիք... մենք փող չունեինք..., բա էս ծախսն ինչի՞ եք արել»,- ասաց Մամիջանյանը: