«Ռուսաստանը լրջորեն մտահոգված է Ղարաբաղում իրավիճակի սրմամբ». Զախարովա

ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է մարտի 5-ին Արցախում տեղի ունեցած ադրբեջանական ագրեսիայի միջադեպը: Դիվանագետի խոսքով՝ ՌԴ-ն լրջորեն մտահոգված է իրավիճակի սրմամբ և կողմերին զսպվածության և դեէսկալացիայի կոչ է անում: Զախարովան նաև նշել է, որ Ռուսական կողմը վերահաստատում է 2020թ. նոյեմբերի 9-ի ՌԴ, ՀՀ և ԱՀ ղեկավարների եռակողմ հայտարարության պահանջները անվերապահորեն կատարելու անհրաժեշտությունը:

«Կատարվածը վերահաստատում է Երևանի և Բաքվի բանակցային սեղանի շուրջ վերադառնալու հրամայականը՝ եռակողմ հայտարարությունների պահանջները կատարելու նպատակով»,-հավելել է Զախարովան՝ ընդգծելով, որ նշված պահանջների մեջ են մտնում նաև «տարածաշրջանային հաղորդակցության ուղիների ապաշրջափակումը, հայ-ադրբեջանական սահմանի դելիմիտացիան և խաղաղության համաձայնագրի նախապատրաստումը»:

Ռուսական խաղաղապահ կոնտինգենտի պատասխանատվության գոտում անվտանգության և կյանքի ապահովման հետ կապված ցանկացած հարց պետք է լուծվի խաղաղ ճանապարհով՝ ՌԽԿ-ի հովանու ներքո իրականացվող շփման արդյունքում։