«Շատ կարևոր է, որպեսզի երևանաբնակները չփոշիացնեն իրենց ձայները». Աննա Կոստանյան

ՀՀ ԱԺ նախկին պատգամավոր Աննա Կոստանյանի ֆեյսբուքյան գրառումը․ «Այս ընտրությունները ոչ ճակատագրական, ոչ էլ կարևոր են լինելու երկրում իրավիճակ փոխելու առումով, չնայած սա ի սկզբանե էլ պարզ էր, սակայն համոզմունքս էլ ավելի ամրապնդվեց թեկնածուների երեկվա բանավեճը նայելուց հետո։ Էստեղ գուցե շատերը հակադարձեն միանշանակ արած պնդումներիս համար, բայց չեմ հիմնավորի՝ զուտ չվնասելու համար «երկու կտոր» մնացած ընդդիմադիր ուժերին։
Իրականում «ճիշտ» կլիներ, եթե «իսկական» ընդդիմադիր ուժերը միասնաբար բոյկոտեին և ընտրությունները չկայանային, քանի Արցախն օրհասական վիճակում է։ Սակայն քանի որ նման միամտություն չունեմ, թե կանեն, որովհետև ոմանք հավատում են, թե Երևանում կարողանալու են ընտրություններով իրավիճակ փոխել գործող ռեժիմի գոյության պայմաններում, կոտրել իշխանության ողնաշարը, ու քանի որ ամենայն հավանականությամբ ընտրությունները կայանալու են, շատ կարևոր է, որպեսզի երևանաբնակները (դե երևանցիներ համարյա չկան այլևս) չփոշիացնեն իրենց ձայները ու քվեարկեն ամենաշատ շանսեր ունեցող ընդդիմադիր ուժին։
Ի դեպ, երեկվա բանավեճը բավականին լյուստրացիոն էր՝ հասկանալու, թե ով է պատրաստ իշխանության հետ դաշինք կազմել ընտրություններից հետո։
Մի խոսքով, այս պայմաններում կարևոր է մասնակցությունը և կարեւոր է, որ չառաջնորդվեք ձեր անձնական, դասական, ԽԾԲ-ական մոտեցումներով, այլև ռեալ պատկերացնելով, թե ով է պատրաստ և ունակ դիմադրելու, հակակշռելու դե-ֆակտո իշխանությանը քաղաքային կառավարման ընթացքում, ով է իրական և ով «ֆեյք»։ Էս վերջինն էնքան ակնհայտ է...»: