«Ես չեմ հիշում Երևանի ավագանու ընտրություններում նման ցածր ցուցանիշ». ԿԸՀ նախագահ

Երևանի ավագանու 2023 թվականի ընտրությունները մասնակցության ամենացածր ցուցանիշն են արձանագրել, հայտնեց Կենտրոնական ընտրական հանձնաժողովի նախագահ Վահագն Հովակիմյանը։

«Ընտրությունների մասնակցության այս ցուցանիշը, թերևս, Երևանի համար ամենացածրն է։ Ես չեմ հիշում Երևանի ավագանու ընտրություններում նման ցածր ցուցանիշ։ Կարող եմ ասել, որ վերջին ընտրությունների մասնակցության դինամիկան գնացել է դեպի նվազման։

Ավելին, սա ընտրողների որոշումն է։ Եվ ինչպես քվեարկելն է ընտրողի իրավունքը, այնպես էլ չքվեարկելը։ Որպես ընտրական գործընթացներին մասնագիտորեն տիրապետող անձ՝ կարող եմ ասել, որ ազատ ու ժողովրդավարական ընտրությունները ողջ աշխարհում ունեն մասնակցության ցածր մակարդակ»,- ասաց Հովակիմյանը։

Երևանի ավագանու ընտրություններին մասնակցել է քվեարկելու իրավունք ունեցող 824 հազար 250 քաղաքացիներից 234 հազար 553 ընտրող կամ 28,46%-ը: