«Ես չեմ համագործակցի ավտոկրատների և կոմունիստների հետ». Արգենտինայի նորընտիր նախագահ

Արգենտինայի նորընտիր նախագահ Խավիեր Միլեյը հայտարարել է, որ չի ցանկանում համագործակցել ավտոկրատների և կոմունիստների հետ: Նա ընդգծել է իր աջակցությունը նրանց, ովքեր պաշտպանում են ազատությունն ու խաղաղությունը և հավատում են ազատական ժողովրդավարության սկզբունքներին:

LN+ հեռուստաալիքին տված հարցազրույցում նա նաև նշել է, որ չի սատարի ավտորիտար ռեժիմներին և կոմունիստներին, թեև չի հստակեցրել, թե կոնկրետ որ երկրների մասին է խոսքը:

Միլեյը դատապարտել է Վենեսուելայի նախագահ Նիկոլաս Մադուրոյի բռնապետությունը և իր հասցեին նրա արտահայտություններն անվանել անտեղի: Ավելի վաղ Մադուրոն ընտրություններում Միլեյի հաղթանակն անվանել էր «ծայրահեղ աջական նեոֆաշիզմ»:

Միլեյը չի նախատեսում միջպետական հարաբերություններ զարգացնել Բրազիլիայի, Չինաստանի և Ռուսաստանի հետ՝ նրանց քաղաքականության հետ անհամաձայնության պատճառով: Սակայն նա ընդգծել է, որ չի խոչընդոտի այդ երկրների հետ մասնավոր բիզնեսին: Միլեյն իր առաջնահերթ դաշնակիցներ է անվանում Իսրայելին և ԱՄՆ-ին: