«Այլևս ոչ մի բանակցություն՝ մինչև թշնամու լիակատար ջախջախումը»․ Մեդվեդև

ՌԴ Անվտանգության խորհրդի փոխնախագահ Դմիտրի Մեդվեդևը հայտարարել է, որ Կուրսկի մարզի վրա հարձակումից հետո Ուկրաինայի հարցով ոչ մի բանակցություն չպետք է լինի:

«Ըստ իս՝ վերջին շրջանում, թեկուզ տեսականորեն, բայց կար մեկ վտանգ՝ բանակցային թակարդը, որին մեր երկիրը կարող էր գնալ որոշակի հանգամանքների դեպքում, այսինքն՝ խաղաղության մասին վաղ և անհարկի բանակցությունները, որոնք առաջարկվել են միջազգային հանրության կողմից և պարտադրվել Կիևի ռեժիմին։ Անհասկանալի հեռանկարներով և հետևանքներով»,- գրել է Մեդվեդևը Telegram-ում։

Նրա խոսքով՝ Կուրսկի վրա հարձակումից հետո «ամեն ինչ իր տեղն ընկավ»։ «Այլևս ոչ մի բանակցություն՝ մինչև թշնամու լիակատար ջախջախումը»,- հավելել է Մեդվեդևը։